ក្រសួងការពារជាតិកូរ៉េខាងត្បូងបាននិយាយថាកូរ៉េខាងជើងនៅព្រឹកថ្ងៃពុធនេះបានបាញ់សាកល្បងគ្រាប់មីស៊ីលថ្មីមួយទៀត សំដៅទៅសមុទ្រជប៉ុន ដែលបង្ហាញឲ្យឃើញច្បាស់ពីប្រតិកម្មរបស់ក្រុងព្យុងយ៉ាងទៅនឹងផែនការដាក់ពង្រាយខែលការពារមីស៊ីលរបស់អាមេរិក។
ទីភ្នាក់ងារព័ត៌មាន AFP បានដកស្រង់សម្ដីក្រសួងការពារជាតិកូរ៉េខាងត្បូងដែលបាននិយាយថាគ្រាប់មីស៊ីលនោះត្រូវបានបាញ់ចេញពីភាគខាងលិចនៃទីក្រុងអ៊ុនយ៉ុល នៅម៉ោងប្រហែល៧និង៥០នាទីព្រឹកថ្ងៃពុធនេះឬត្រូវនឹងម៉ោងប្រហែល៦និង៥០នាទីព្រឹកម៉ោងនៅប្រទេសកម្ពុជា។
ការបាញ់សាកល្បងនេះបានកើតឡើងក្រោយពីការបាញ់គ្រាប់មីស៊ីល៣គ្រាប់កាលពីថ្ងៃទី១៩ខែកក្កដាកន្លងមក ដែលនោះគឺជាអ្វីដែលក្រុងព្យុងយ៉ាងប្រកាសគំរាមទៅលើកូរ៉េខាងត្បូង។
ក្រុងព្យុងយ៉ាងបានសាកល្បងគ្រាប់មីស៊ីលជាបន្តបន្ទាប់នៅឆ្នាំនេះ ដែលប្រឆាំងទៅនឹងទណ្ឌកម្មអង្គការសហប្រជាជាតិ ហើយប្ដេជ្ញាវាយប្រហារសងសឹកទៅនឹងផែនការដាក់ពង្រាយខែលការពារមីស៊ីលរបស់អាមេរិកនៅកូរ៉េខាងត្បូង។
សេចក្ដីសម្រេចរបស់អង្គការសហប្រជាជាតិបានហាមឃាត់កូរ៉េខាងជើងមិនឲ្យអភិវឌ្ឍបច្ចេកវិទ្យាគ្រាប់មីស៊ីលនោះឡើយ៕
