ស្ថានទូតអាមេរិកនៅថ្ងៃពុធនេះបានចេញសារព្រមានមួយ ដោយបានណែនាំពលរដ្ឋអាមេរិកឲ្យគេចចេញពីក្រុមមហាជននិងការតវ៉ានានាចំពោះការបោះឆ្នោតប្រជាមតិលើរដ្ឋធម្មនុញ្ញថ្មីរបស់ថៃនៅថ្ងៃអាទិត្យខាងមុខនេះ។
សេចក្ដីប្រកាសណែនាំរបស់ស្ថានទូតអាមេរិកប្រចាំប្រទេសថៃបាននិយាយថាពលរដ្ឋអាមេរិកត្រូវបានណែនាំឲ្យប្រុងប្រយ័ត្ននិងតាមដានប្រព័ន្ធផ្សព្វផ្សាយអន្តរជាតិនិងសារព័ត៌មានក្នុងប្រទេសថៃ។
ស្ថានទូតអាមេរិកបានណែនាំពលរដ្ឋអាមេរិកឲ្យគេចចេញពីកន្លែងបាតុកម្ម កន្លែងប្រមូលម្ដុំធំៗ ឬកន្លែងប្រតិបត្តិការសន្តិសុខ ហើយអនុវត្តតាមសេចក្ដីណែនាំនិងវិធានការនានា ចេញដោយអាជ្ញាធរមូលដ្ឋាន។
សារព្រមាននេះបានកត់សម្គាល់ថា ក្រុមមន្ត្រីសន្តិសុខបានសិទ្ធិអំណាចយ៉ាងខ្លាំងក្នុងការឆែកឆេរបុគ្គលណាម្នាក់ ក្នុងនោះរួមទាំងជនបរទេសផងដែរ៕
