មនុស្សយ៉ាងតិច ៤៥នាក់ ត្រូវបានសម្លាប់នៅថ្ងៃចន្ទនេះ ហើយរាប់សិបនាក់ទៀត បានរងរបួស បន្ទាប់ពីមានការបំផ្ទុះគ្រាប់បែកនៅក្នុងមន្ទីរពេទ្យដ៏ធំមួយនៅទីក្រុងហ្គេតតា ប្រទេសប៉ាគីស្ថាន ខណៈមានក្ដីបារម្ភថា ចំនួនអ្នកស្លាប់អាចកើនឡើង។
ទីភ្នាក់ងារ AFP បានផ្សាយថា រូបភាពវីដេអូពីកន្លែងកើតហេតុ បានបង្ហាញសាកសពនៅលើដី ហើយខ្លះទៀតនៅឆេះហ៊ុយផ្សែងនៅឡើយ នៅក្នុងថ្លុកឈាម និងហ្គាស ខណៈអ្នកនៅរស់រានមានជីវិត ស្រែកយំទាំងតក់ស្លុក និងឱបគ្នាទៅវិញទៅមក។
ស្លាកស្នាមឆេះដ៏ធំនៅលើជញ្ជាំងស បានបង្ហាញពីកន្លែងផ្ទុះកើតឡើង។
AFP បានដកស្រង់សម្ដីក្រុមមន្ត្រីថា ការផ្ទុះនេះ បានកើតឡើងក្រោយពីអ្នកកាន់ទុក្ខ ក្នុងនោះមានទាំងអ្នកកាសែត និងមេធាវីផងដែរ បានប្រមូលផ្ដុំគ្នានៅឯមន្ទីរពេទ្យនោះ ក្រោយពីមានការបាញ់សម្លាប់មេធាវីជាន់ខ្ពស់ម្នាក់នៅក្នុងតំបន់។ អ្នកស្លាប់ជាច្រើន ស្ថិតក្នុងសម្លៀកបំពាក់ពណ៌ខ្មៅ។
មន្ត្រីរដ្ឋបាលជាន់ខ្ពស់នៅទីក្រុងហ្គេតតា លោក Daud Khilji បាននិយាយថា មនុស្សជាង ២០នាក់ ត្រូវបានសម្លាប់ ក្នុងនោះមានអ្នកថតរូប ២នាក់ផងដែរ៕
