អាជ្ញាធរខេត្តស៊ូរ៉ាត់ថានីនៅភាគខាងត្បូងប្រទេសថៃ បានប្រកាសផ្ដល់ប្រាក់រង្វាន់១សែនបាតចំពោះបុគ្គលណាផ្ដល់ព័ត៌មានអំពីជនសង្ស័យ៤រូបដែលត្រូវបានគេជឿថាជាអ្នកទទួលខុសត្រូវចំពោះការបំផ្ទុះគ្រាប់បែកនៅខេត្តនេះកាលពីថ្ងៃទី១២ខែសីហា។
កាសែតបាងកកប៉ុស្តិ៍ បានផ្សាយថាមុខជនសង្ស័យទាំង៤រូបនេះត្រូវកាមេរ៉ាសុវត្ថិភាពចាប់បានកាលពីថ្ងៃទី១២ ខែសីហាកន្លងមក ប៉ុន្តែមិនច្បាស់លាស់ ដោយសារពួកគេពាក់ម៉ាស់មុខ មួក និងវែនតា។
កាសែតថៃមួយនេះបានដកស្រង់សម្ដីមេតម្រួតថៃនៅខេត្តស៊ូរ៉ាត់ថានី ដែលបាននិយាយនៅថ្ងៃនេះថាតម្រួតខេត្តមួយនេះបានសម្រេចផ្ដល់ប្រាក់រង្វាន់ដល់មហាជនឲ្យជួយរកជនសង្ស័យទាំង៤នោះ។
កាសែតនេះបានផ្សាយបន្តថាតម្រួតថៃផ្ដល់ប្រាក់រង្វាន់១សែនបាតជាថ្នូរទៅនឹងការផ្ដល់ព័ត៌មានអំពីរូបរាងជនសង្ស័យ ទីកន្លែងរស់នៅរបស់ជនសង្ស័យ ព្រមទាំងទីកន្លែងដែលជនសង្ស័យចេញទៅហូបអាហារ។
ការបំផ្ទុះគ្រាប់បែកចំនួន១៣លើកនិងការបំផ្លាញទ្រព្យសម្បត្តិ បានវាយប្រហារទៅលើទីក្រុងនិងខេត្តនានានៅភាគខាងត្បូងប្រទេសថៃកាលពីថ្ងៃទី១១និងថ្ងៃទី១២ ខែសីហាកន្លងមក ដោយបានផ្ដាច់ជីវិតមនុស្ស៤នាក់និងបង្កឲ្យមនុស្ស៣៥នាក់រងរបួស៕
