ទឹកជំនន់បានជន់លិចមណ្ឌលមនុស្សចាស់មួយនៅជប៉ុន ដោយបានសម្លាប់មនុស្ស៩នាក់ ដែលធ្វើឲ្យចំនួនអ្នកស្លាប់បណ្ដាលមកពីព្យុះទីហ្វុងបោកបក់ទៅលើភាគខាងជើងជប៉ុនកើនឡើងដល់យ៉ាងតិច១១នាក់។
នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលបានដកស្រង់សម្ដីប៉ូលិសជប៉ុន។
Reuters បានផ្សាយថាប៉ូលិសបានរកឃើញសពមនុស្ស៩នាក់នៅក្នុងមណ្ឌលមនុស្សចាស់នោះ ស្ថិតនៅទីក្រុង Iwaizumi នៅថ្ងៃពុធនេះ ប៉ុន្តែប៉ូលិសមិនបានដឹងច្បាស់ថា តើមណ្ឌលនោះត្រូវទឹកជន់លិចតាំងពេលណានោះទេ។
Reuters បានបន្តថាប៉ូលិសក៏មិនច្បាស់ផងដែរថា ហេតុអ្វីមនុស្សទាំងនោះ មិនត្រូវបានគេនាំចេញទៅកន្លែងមានសុវត្ថិភាពនៅមុនព្យុះបោកបក់ទៅលើ។
មនុស្សជាង១ពាន់នាក់ទៀតត្រូវបានបង្ខំឲ្យចាកចេញពីផ្ទះសម្បែងរបស់ពួកគេ ដោយសារទឹកជំនន់កើតចេញពីព្យុះទីហ្វុង Lionrock។
ប៉ូលិសប្រាប់ Reuters ថាសពបុរសម្នាកត្រូវបានគេប្រទះឃើញនៅជិតទន្លេនៅទីក្រុង Iwaizumi ហើយសពស្ត្រីម្នាក់ត្រូវបានគេប្រទះឃើញនៅទីក្រុង Kuji។
ទូរទស្សន៍បានបង្ហាញរូបភាពទឹកជំនន់នៅទន្លេនោះដោយមានរថយន្តនិងផ្ទះសម្បែងលិចនៅក្នុងលិច ខណៈក្រុមជួយសង្គ្រោះបានជិះឧទ្ធម្ភាគចក្រជួយមនុស្សជាប់នៅក្នុងទឹកជំនន់។
ប៉ូលិសនិយាយថា មនុស្សជាច្រើននាក់កំពុងបាត់ខ្លួននៅភាគខាងជើងកោះ Hokkaido៕
