នាយករដ្ឋមន្ត្រីអង់គ្លេស អ្នកស្រី Theresa May បានថ្លែងនៅថ្ងៃនេះថា សេដ្ឋកិច្ចចក្រភពអង់គ្លេស នឹងរងគ្រោះ ដែលជាលទ្ធផលនៃការសម្រេចចិត្តចាកចេញពីសហភាពអឺរ៉ុប ទោះបីជាតួលេខសេដ្ឋកិច្ចនាពេលថ្មីៗនេះ បានបង្ហាញថា ផលប៉ះពាល់នៅមិនទាន់ធ្ងន់ធ្ងរដូចការព្យាករទុកក៏ដោយ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ពីទីក្រុងហង់ចូវ ភាគខាងត្បូងប្រទេសចិន ជាទីដែលមេដឹកនាំបណ្ដាប្រទេសមានសេដ្ឋកិច្ចធំៗចំនួន ២០ ឬហៅកាត់ថា G20 កំពុងជួបប្រជុំគ្នា។
Reuters បានបន្តថា ការសម្រេចចិត្តរបស់អង់គ្លេសកាលពីខែមិថុនា ចាកចេញពីសហគមន៍មានសមាជិក ២៨ប្រទេសមួយនេះ បានធ្វើឲ្យទីផ្សារហិរញ្ញវត្ថុតក់ស្លុតដាំក្បាលចុះ ខណៈចក្រភពអង់គ្លេសស្ថិតក្នុងដំណើរការរៀបចំផ្ដាច់ខ្លួនពីដៃគូពាណិជ្ជកម្មដ៏ធំបំផុតនេះ និងបានតួនាទីសេដ្ឋកិច្ចសកលថ្មីផ្លាស់ប្ដូរ។
តម្លៃរូបិយប័ណ្ណអង់គ្លេស បានងើបឡើងវិញ កាលពីថ្ងៃព្រហស្បតិ៍កន្លងមក បន្ទាប់ពីការស្ទង់មតិតទៅលើក្រុមហ៊ុននានា បានផ្ដល់សញ្ញាដ៏សំខាន់ៗថា សេដ្ឋកិច្ចចក្រភពអង់គ្លេស នឹងមានដំណើរការកាន់តែល្អប្រសើរជាងមនុស្សជាច្រើនព្រួយបារម្ភកាលពីដំបូង។
ប៉ុន្តែ អ្នកស្រី May បានព្យាករថា ការបោះឆ្នោតសម្រេចចាកចេញនេះ នឹងធ្វើឲ្យអន្តរាយដល់សេដ្ឋកិច្ច ហើយថា រដ្ឋាភិបាលនឹងបន្តតាមដានតួលេខសេដ្ឋកិច្ច នៅប៉ុន្មានខែខាងមុខ មុននឹងរៀបចំការឆ្លើយតបរបស់ខ្លួន សម្រាប់ការពារសេដ្ឋកិច្ចនៅប៉ុន្មានខែក្រោយក្នុងឆ្នាំនេះ៕
