អតីតនាយករដ្ឋមន្ត្រីអង់គ្លេស លោក David Cameron បានលាលែងពីសមាជិកសភាអង់គ្លេសហើយកាលពីថ្ងៃម្សិលមិញ ដែលកើតឡើងមិនដល់៣ខែក្រោយពីលោកបរាជ័យនៅក្នុងការបោះឆ្នោតប្រជាមតិមួយ ដែលលោកមិនចង់ឲ្យអង់គ្លេសចាកចេញពីសហគមន៍អឺរ៉ុប។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
លោក Cameron បានចុះចេញពីតំណែងជានាយករដ្ឋមន្ត្រីកាលពីខែមិថុនាតែប៉ុន្មានម៉ោងក្រោយពីការបោះឆ្នោតប្រជាមតិសម្រេចចាកចេញពីសហភាពអឺរ៉ុប ដោយលោកបានប្រគល់តំណែងទៅអ្នកស្រី Theresa May កាលពីខែកក្កដាកន្លងមក។
បើតាម AFP លោក Cameron បានប្រកាសថា លោកចាកចេញពីនយោបាយដោយសារតែកាលៈទេសៈនិងតថភាពនយោបាយសម័យទំនើប ដែលធ្វើឲ្យលោកពិបាកបន្តទៅមុខទៀត ប៉ុន្តែលោកថា លោកគាំទ្រអ្នកស្រី May យ៉ាងពេញទំហឹង ព្រមទាំងមានទំនុចចិត្តថាអង់គ្លេសនឹងកាន់តែរីកលូតលាស់ក្រោមការដឹកនាំរបស់អ្នកស្រី។
អតីតនាយករដ្ឋមន្ត្រីរូបនេះបានរងការរិះគន់ ក្រោយពីបរាជ័យនៅក្នុងការបោះឆ្នោតប្រជាមតិដ៏គួរឲ្យភ្ញាក់ផ្អើលនាពេលកន្លងមក។
ក្រុមអ្នករិះគន់បានចោទលោកថាគឃ្លើនក្នុងការរៀបចំប្រជាមតិតាំងពីដំបូងនិងចាត់ចែងមិនត្រឹមត្រូវនៅក្នុងយុទ្ធនាការប្រឆាំងនឹងការចាកចេញពីសហគមន៍អឺរ៉ុប៕
