យន្តហោះទម្លាក់គ្រាប់បែក២គ្រឿងរបស់កងយោធាអាមេរិកបានហោះហើរពីលើប្រទេសកូរ៉េខាងត្បូងនៅព្រឹកថ្ងៃអង្គារនេះដែលជាការបង្ហាញអំណាចនិងសាមគ្គីភាពជាមួយកងទ័ពកូរ៉េខាងត្បូងចំពេលមានភាពតានតឹងកាន់តែខ្លាំងនៅឧបទ្វីបកូរ៉េ ក្រោយការសាកល្បងគ្រាប់បែកនុយក្លេអ៊ែរលើកទី៥របស់កូរ៉េខាងជើង។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
បើតាម Reuters យន្តហោះទម្លាក់គ្រាប់បែក B-1 ២គ្រឿងនោះបានអនុវត្តការហោះហើរក្នុងកម្ពស់ទាបបំផុតនៅលើមូលដ្ឋានកងទ័ពអាកាសអូសាន នៅកូរ៉េខាងត្បូង ដែលស្ថិតនៅចម្ងាយ៧៧គីឡូម៉ែត្រ ពីតំបន់ព្រំដែនគ្មានយោធារវាងកូរ៉េទាំងពីរនិងស្ថិតក្នុងចម្ងាយប្រហែល៤០គីឡូម៉ែត្រពីទីក្រុងសេអ៊ូល។
តាមគម្រោង ការហ្វឹកហាត់នេះត្រូវបានរៀបចំធ្វើឡើងកាលពីថ្ងៃម្សិលមិញ ប៉ុន្តែបានពន្យារពេល ដោយសារតែបញ្ហាអាកាសធាតុនៅកោះហ្គាម ដែលជាមូលដ្ឋានរបស់យន្តហោះទម្លាក់គ្រាប់នេះ។
យន្តហោះគ្រាប់បែកនោះមានសមត្ថភាពអាចដឹកអាវុធដែលបញ្ជាពីចម្ងាយនិងអាវុធគ្មានការបញ្ជារបស់កងទ័ពអាកាសអាមេរិក។ យន្តហោះចម្បាំងកូរ៉េខាងត្បូងនិងអាមេរិក បានបើកអមយន្តហោះទាំងពីរគ្រឿងនោះអំឡុងពេលហ្វឹកហាត់ហោះហើរយឺតៗនៅលើមូលដ្ឋានយោធាអូសាន៕
