អាជ្ញាធរសុខាភិបាលថៃបានឲ្យដឹងថា ការរីករាលដាលនៃវីរុសហ្ស៊ីកាប្រហែល២០០ករណីត្រូវបានគេរកឃើញ ចាប់តាំងពីខែមករាដើមឆ្នាំនេះ ដែលធ្វើឲ្យថៃក្លាយប្រទេសមួយមានវីរុសប្រភេទនេះខ្ពស់ជាងគេនៅក្នុងតំបន់។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បញ្ជាក់ថានេះជាលើកដំបូងហើយដែលក្រសួងសុខាភិបាលថៃបានបញ្ជាក់ពីចំនួនករណីឆ្លងវីរុសហ្ស៊ីកា នៅក្នុងឆ្នាំនេះ។
ការប្រកាសដូច្នេះរបស់អាជ្ញាធរសុខាភិបាលថៃ បានកើតឡើងមួយថ្ងៃក្រោយពីអ្នកជំនាញសុខាភិបាលបានអំពាវនាវទៅប្រទេសនេះឲ្យបង្ហាញតម្លាភាពនៅក្នុងការរាយការណ៍ពីការរីករាលដាលនៃវីរុសហ្ស៊ីកាទៅដល់សាធារណជន បន្ទាប់ពីក្រុមមន្ត្រីសុខាភិបាលថៃមិនសូវឲ្យតម្លៃលើ់ហានិភ័យកើតចេញពីការរីករាលដាលនៃវីរុសនេះ។
ក្រុមមន្ត្រីសុខាភិបាលបានបង្ហាញក្ដីបារម្ភថា ការទម្លាយព័ត៌មាននៃការរីករាលដាលវីរុសហ្ស៊ីកានេះនឹងធ្វើឲ្យអន្តរាយដល់ឧស្សាហកម្មទេសចរណ៍របស់ប្រទេសនេះ។
ចំណែកនៅឯប្រទេសសិង្ហបុរីឯណោះវិញ អាជ្ញាធរសុខាភិបាលបានរាយការណ៍ពីអ្នកជំងឺឆ្លងវីរុសហ្ស៊ីកាលើកទីមួយកាលពីថ្ងៃទី២៧ខែសីហាកន្លង ហើយចាប់តាំងពីពេលនោះមក ចំនួននៃការឆ្លងវីរុសហ្ស៊ីកាបានកើនឡើងរហូតដល់ជាង៣០០ករណីហើយ៕
