ស្រ្តីខ្មែរម្នាក់ដែលទៅធ្វើនៅក្រៅប្រទេស ត្រូវបានបុរសបរទេសម្នាក់វាយដំនិងច្របាច់ក ផ្តួលនៅក្នុងបន្ទប់មួយនៅប្រទេសកូរ៉េខាងត្បូង។ នេះបើតាមវីដេអូឃ្លីបមួយដែលត្រូវបានផ្សាយនៅតាមហ្វេសប៊ុក។
ស្ថានទូតកម្ពុជាប្រចាំកូរ៉េខាងត្បូងបានឲ្យដឹងតាមហ្វេសប៊ុករបស់ខ្លួនថា៖ “ជនរងគ្រោះឈ្មោះ សួង ស្រីនិច អាយុ ២៨ឆ្នាំ មកពីស្រុកព្រៃកប្បាស ខេត្តតាកែវ កំពុងបម្រើការងារផ្នែកឧស្សាហកម្ម នៅតំបន់ អ៊ឺយចុងប៊ូ ត្រូវបានមេការជនជាតិចិនម្នាក់ ប្រើអំពើហិង្សាវាយមកលើខ្លួនក្នុងផ្ទះបាយ កាលពីម៉ោង១០យប់ថ្ងៃ១៣ ខែកញ្ញា ឆ្នាំ២០១៦ ”។
បើតាមហ្វេសប៊ុករបស់ស្ថានទូតកម្ពុជា លោក ឡុង ឌីម៉ង់ ឯកអគ្គរាជទូត បានចាត់ឲ្យក្រុមការងារស្ថានទូតសួរនាំជនរងគ្រោះ ដើម្បីស្ដាប់ដំណើររឿងនិងស្វែងរកដំណោះស្រាយផ្លូវច្បាប់ជូនគាត់។ ទីក្រុងសេអ៊ូល បានផ្តល់កូតានាំពលករខ្មែរទៅធ្វើការងារនៅទីនោះ ក្នុងមួយឆ្នាំៗចន្លោះពី៣០០០ទៅ៥០០០នាក់៕
