ការបាញ់ប្រយុទ្ធគ្នាបានផ្ទុះឡើងនៅតាមព្រំដែនមានជម្លោះរវាងឥណ្ឌានិងប៉ាគីស្ថាននៅតំបន់កាស្មៀ កាលពីថ្ងៃម្សិលមិញនេះ ពោលគឺ២ថ្ងៃក្រោយពីមានការវាយប្រហារដ៏បង្ហូរឈាមទៅលើមូលដ្ឋានឥណ្ឌា ដែលក្រុងញូវដេលីបានថ្កោលទោសទៅលើពួកឧទ្ទាមមានមូលដ្ឋាននៅប៉ាគីស្ថាន។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
យោងតាម AFP ទាហាន ១៨នាក់ បានស្លាប់នៅក្នុងការវាយប្រហារកាលពីថ្ងៃអាទិត្យកន្លងមកនេះ ដែលជាការវាយប្រហារដ៏អាក្រក់បំផុត កើតមាននៅតំបន់ជួរភ្នំហិមាល័យ នៅក្នុងរយៈពេលជាង ១ទសវត្សរ៍មកនេះ និងបានបង្កើនអរិភាពរវាងប្រទេសនៅជិតខាងនឹងគ្នានេះ ដែលសុទ្ធតែមានអាវុធនុយក្លេអ៊ែរនៅក្នុងដៃរៀងៗខ្លួន។
ប៉ាគីស្ថាន បានច្រានចោលការអះអាងពីឥណ្ឌា ដោយចាត់ទុកជាអំណះអំណាង “គ្មានមូលដ្ឋាន និងឆាប់ធ្វើសេចក្ដីសន្និដ្ឋានលឿនពេក”។
ប្រមុខកាទូតអាមេរិក លោក ចន ឃើរី បានបង្ហាញក្ដីបារម្ភជុំវិញអំពើហិង្សានៅតំបន់កាស្មៀរ ដោយជំរុញឲ្យភាគីទាំងពីរកាត់បន្ថយភាពតានតឹង។
AFP បានដកស្រង់សម្ដីមន្ត្រីយោធាឥណ្ឌា ដែលបាននិយាយថា មានការរំលោភបទឈប់បាញ់នៅតំបន់ Uri ជាទីដែលកើតមានការវាយប្រហារកាលពីថ្ងៃអាទិត្យកន្លងមក ប៉ុន្តែ ពុំបានផ្ដល់ព័ត៌មានលម្អិតបន្ថែមទៀតនោះឡើយ។ Uri គឺស្ថិតនៅជិតខ្សែបន្ទាត់គ្រប់គ្រង ដែលបែងចែងដែនដីមានជម្លោះ៕
