លោក កឹម សុខា នឹងទៅចុះឈ្មោះបោះឆ្នោតនៅសប្តាហ៍នេះ បើទោះជាលោកនៅជាប់បណ្តឺងពីតុលាការក៍ដោយ។ នេះបើតាមការបញ្ជាក់របស់មន្ត្រីជាន់ខ្ពស់នៃគណបក្សសង្គ្រោះជាតិ។
រហូតមកដល់ពេលនេះគឺមានរយៈពេលជាង៤ខែហើយដែលប្រធានស្តីទីគណបក្សសង្គ្រោះជាតិ ស្នាក់នៅតែក្នុងស្នាក់ការបក្សនៅសង្កាត់ចាក់អង្រែគេចពីការចាប់ខ្លួនរបស់សមត្ថកិច្ចទាក់ទងទៅនឹងសំណុំរឿងអាស្រូវស្នេហា។
តំណាងរាស្ត្របក្សប្រឆាំង លោក យ៉ែម បុញ្ញឫទ្ធិ បានប្រាប់វីអូឌី ថា លោក កឹម សុខា នឹងចេញទៅចុះឈ្មោះបោះឆ្នោតនៅក្នុងសប្តាហ៍នេះ តែលោកពុំបានបញ្ជាក់អំពីទីកន្លែង និងពេល វេលាឲ្យបានជាក់លាក់ឡើយទេ។
លោកមានប្រសាសន៍ថា“ គាត់ពុំបានបញ្ជាក់ដែរថាទៅចុះទីណានិងទៅថ្ងៃណា គ្រាន់តែលោកមានប្រសាសន៍ថានឹងអាចទៅចុះឈ្មោះ នៅសប្តាហ៍នេះ ” ។
នាយកប្រត្តិបតិអង្គការឃ្លាំមើលការបោះឆ្នោតដោយសេរី និងយុត្តិម៌ នៅកម្ពុជាហៅកាត់ថា ខុមហ្វ្រែល លោក គល់ បញ្ញា មានប្រសាសន៍ថា លោក កឹម សុខា អាចមានសិទ្ធិទៅចុះឈ្មោះបោះឆ្នោតបាន ប៉ុន្តែលោកក៍មិនច្បាស់ដែរថា លោកកឹម សុខាអាចនឹងត្រូវគេប្តឹងលុបឈ្មោះចេញពីបញ្ជីបោះឆ្នោតដែរឬទេ ដោយសារតែច្បាប់របស់កម្ពុជាចែងហាក់ដូចជាទូលំទូលាយក្នុងការបកស្រាយ ។
លោកមានប្រសាសន៍ថា “ ធម្មតាគណៈបក្សនយោបាយគេនឹងប្តឹងនៅពេលបិទបញ្ជីដំបូង អញ្ចឹងចាំមើលការបកស្រាយអំពីលក្ខណ្ឌនៃអ្នកចុះឈ្មោះបោះឆ្នោតនៅក្នុងពន្ធនាគារអត់ទាន់មានការបកស្រាយច្បាស់លាស់ទេ ប៉ុន្តែស្តង់ដា ដែលគែគេអនុវត្តន៍កន្លងមកទាល់តែអ្នកនោះគេកាត់ទោសជាប់ពន្ធនាគារជាស្ថាពរ មានន័យថាទាល់តែកាត់ទោសពីតុលាការកំពូល ហើយជាស្ថាពរទៀត ប៉ុន្តែឥឡូវក្នុងច្បាប់ខ្មែរយើង យើងប្រើពាក្យស្ថានភាពក្នុងពន្ធាគារ វាមិនដឹងថាទាល់តែកាត់ទោសជាស្ថាពរហើយ ហើយទាល់តែនៅក្នុងពន្ធនាគារ ទៀត ឬមិនដឹងយ៉ាងម៉េចទេពាក្យខ្មែរ មិនដឹងច្បាប់គេទុកឲ្យបកស្រាយនឹងអាចបង្ករបញ្ហាដែរ ”។
វីអូឌីមិនអាចទាក់ទងអ្នកនាំពាក្យគ.ជ.ប លោក ហង្ស ពុទ្ធា បាននៅឡើយទេដោយទូរសព្ធលោកចូលតែពុំមានអ្នកទទួល។
គួរបញ្ជាក់ផងដែរថា កាលពីថ្ងៃទី១៥ កញ្ញាកន្លងទៅគ.ជ.ប បានបញ្ជាក់ប្រាប់អ្នកសារព័ត៌មានក្នុងសន្និសីទសារព័ត៌មានរបស់ខ្លួនថា ពលរដ្ឋគ្រប់រូបរាប់ទាំងលោក កឹម សុខា ផងដែរដែលមានឯកសារបញ្ជាក់អត្តសញ្ញាណគ្រប់គ្រាន់ គឺអាចចុះឈ្មោះបោះឆ្នោតបាន តែថាត្រូវទៅបង្ហាញមុខដោយផ្ទាល់នៅចំពោះមុខភ្នាក់ងារចុះឈ្មោះបោះឆ្នោត៕
