ស្ថាននានានៅក្នុងប្រទេសថៃបានណែនាំឲ្យប្រជាពលរដ្ឋរបស់ពួកគេដែលធ្វើដំណើរកំសាន្តក្នុងប្រទេសថៃ ត្រូវមានឥរិយាបថសមរម្យ គោរពអារម្មណ៍របស់ពលរដ្ឋនៃប្រទេសនេះដែលកំពុងកាន់ទុក្ខដោយសារស្តេច Bhumibol Adulyadej ចូលទិវង្គត។
ស្តេច Bhumibol Adulyadej ជាក្សត្រគ្រងរាជ្យសម្បត្តិយូរបំផុតនៅលើពិភពលោក បានចូលទិវង្គតកាលពីម្សិលមិញក្នុងជន្មាយុ៨៨ព្រះវស្សា។
ក្រោយការប្រកាសពីការចូលទិវង្គតភ្លាម រដ្ឋាភិបាលថៃបានប្រកាសកាន់ទុក្ខជាផ្លូវការរយៈពេល១ឆ្នាំ ហើយស្នើឲ្យពលរដ្ឋថៃស្លៀកពាក់ខ្លៅនិងជៀសវាងការរៀបចំពិធីផ្សេងៗរយៈពេល១ខែ។ ទោះយ៉ាងណា នាយករដ្ឋមន្ត្រីលោក ប្រាយុទ្ធ អំពាវនាវឲ្យអ្នកធ្វើមុខជំនួញផ្សេងៗនៅរក្សាដំណើរការធម្មតា។ គណៈរដ្ឋមន្ត្រីបានប្រកាសថា ថ្ងៃសុក្រនេះជាការថ្ងៃសម្រាកសម្រាប់កាន់ទុក្ខ ប៉ុន្តែទីផ្សារភាគហ៊ុននិងធនាគារនៅដំណើរការធម្មតា។ នេះបើតាមទីភ្នាក់ងារសារព័ត៌មានរ៉យទ័រ។
មន្ត្រីការបរទេសអង់គ្លេសណែនាំពលរដ្ឋខ្លួនថា អ្នកដែលធ្វើដំណើរទៅប្រទេសថៃត្រូវតែគោរពឲ្យខ្ជាប់ខ្ជួននូវអារម្មណ៍កាន់ទុក្ខរបស់ពលរដ្ឋថៃដូចជាការទៅកន្លែងកំសាន្ត ភោជនីយដ្ឋាន បារ និងហាងលក់ឥវ៉ាន់ផ្សេងៗ។
ក្នុងក្រមព្រហ្មទណ្ឌថៃ មាត្រា១១២បានសរសេរថា បើជនណាបានធ្វើឥរិយាបថមិនសមរម្យ ការប្រមាថ ឬបំពាន ដល់ព្រះមហាក្សត្រ ម្ចាស់ក្សត្រី ឬខ្សែរាជវង្ស នឹងត្រូវផ្តន្ទាទោសឲ្យជាប់ពន្ធនាគារ១៥ឆ្នាំ៕
