ចិនបានបាញ់បង្ហោះយាន្តអវកាសរបស់ខ្លួនដែលមានផ្ទុកមនុស្សពីរនាក់នៅក្នុងនោះ ក្នុងបំណងរៀបចំរចនាឡើង ដើម្បីប្រើសមត្ថភាពក្នុងការស្រាវជ្រាវក្នុងដែនលំហអាកាស។
យាន្តនេះបាញ់ចេញពីមជ្ឈមណ្ឌល Jiuquan នៅភាគខាងជើងនៃប្រទេសចិន។ នេះបើតាមសារព័ត៌មាន BBC។
យាន្តនេះនឹងចូលចត ដើម្បីស្រាវជ្រាវនៅក្នុងទីតាំងពីរកន្លែង ហើយត្រូវចំណាយពេល៣០ថ្ងៃជារយៈពេលយូរបំផុតរបស់អ្នកស្រាវជ្រាវជនជាតិចិននៅលើលំហដែលមិនធ្លាប់មានពីរមុនមក។ បេសកកម្មនេះផ្តោតសំខាន់ទៅលើភពព្រះចន្ទនិងភពព្រះអង្គារ។
អវកាសយានិកទាំងពីរក្នុងការបំពេញបេសកកម្មនេះ គឺម្នាក់ឈ្មោះ Haipeng អាយុ៤៩ឆ្នាំធ្លាប់បានទៅស្រាវជ្រាវក្នុងលំហបានពីរដង និងម្នាក់ទៀតឈ្មោះ Chen Dong អាយុ៣៧ឆ្នាំ។
ចិនជាមហាអំណាចសេដ្ឋកិច្ចធំទី២លើពិភពលោកបន្ទាប់សហរដ្ឋអាមេរិក ហើយកំពុងតែប្រឹងប្រែងពង្រឹងផ្នែកវិទ្យាសាស្ត្ររបស់ខ្លួន ខណៈប្រទេសនេះកំពុងប្រឈមមុខក្នុងជម្លោះដែនសមុទ្រជាមួយប្រទេសជិតខាងនិង សហរដ្ឋអាមេរិកផងដែរ៕
