ប្រជាជនថៃរាប់ម៉ឺននាក់ ដែលស្ថិតក្នុងសម្លៀកបំពាក់អាវខ្មៅនោះ នៅថ្ងៃនេះ បានប្រមូលផ្ដុំគ្នានៅខាងក្រៅរាជវាំងថៃ នៅទីក្រុងបាងកក ដើម្បីច្រៀងភ្លេងរាជវង្ស ដើម្បីឧទ្ទិសទៅដល់វិញ្ញាណក្ខន្ធព្រះមហាក្សត្រ ភូមិបុល អាដុលយ៉ាតេជ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ក្សត្រ ភូមិបុល ដែលបានសោយទិវង្គតដោយសារសុខភាពទន់ខ្សោយនោះ ត្រូវបានគេចាត់ទុកជាប្រទីបបំភ្លឺ និងជាប្រភពនៃឯកភាពជាតិនៅប្រទេសថៃ ដែលជាប់ផុងនៅក្នុងអំពើពុករលួយ និងការប្រជែងផ្នែកនយោបាយ។
ការសោយទិវង្គតរបស់ទ្រង់បានទាញប្រទេសថៃទាំងមូលឲ្យកាន់ទុក្ខ ដោយរដ្ឋាភិបាលថៃបានប្រកាសកាន់ទុក្ខមួយឆ្នាំ និងជំរុញឲ្យមហាជនស្លៀកពាក់ខ្មៅ និងហាមឃាត់រាល់កម្មវិធីកម្សាន្តសប្បាយទាំងអស់ក្នុងរយៈពេល ៣០ថ្ងៃយ៉ាងតិច៕