សកម្មជនមួយចំនួនដែលសកម្មក្នុងការធ្វើយុទ្ធនាការអាវខ្មៅសុំដោះលែងអ្នកជាប់ឃុំនោះឲ្យដឹងថា ពួកគេនឹងប្រមូលផ្តុំគ្នាមុខសាលាដំបូងរាជធានីភ្នំពេញនៅរសៀលថ្ងៃទី២៤តុលានេះ ដើម្បីទាមទារឲ្យដោះលែងមន្រ្តីសិទ្ធិមនុស្ស មន្រ្តី គ.ជ.ប និងតំណាងរបស់ពួកគេគឺអ្នកស្រី ទេព វន្នី។
តំណាងសហគមន៍បឹងកក់ អ្នកស្រី ប៊ូវ សោភា ប្រាប់វីអូឌីថា មូលហេតុដែលពួកគេនាំគ្នាធ្វើយុទ្ធការអាវខ្មៅនៅមុខតុលាការនៅរសៀលនេះ គឺដើម្បីចូលរួមគាំទ្រសមាជិករបស់ពួកគេមួយចំនួនដែលត្រូវតុលាការកោះហៅសាកសួរក្នុងសំណុំរឿងដែលសកម្មជនទាំងនោះប្តឹងសន្តិសុខខណ្ឌដូនពេញថា ប្រើអំពើហិង្សារនៅវត្តភ្នំកាលពីថ្ងៃទី២២ កញ្ញា ឆ្នាំ២០១៣។
អ្នកស្រីបន្ថែមថា៖ «ពួកយើងធ្វើនៅទីនោះហ្នឹង ដោយសារគ្នាយើងចំនួនពីរបីនាក់ ត្រូវតុលាការកោះហៅសាកសួររឿងការហឹង្សារនៅវត្តភ្នំកាល២០១៣ និងលើកបដាទាមទារដោះលេងអ្នកជាប់ឃុំផង »។
ចំណែកតំណាងសហគមន៍បុរីកីឡា អ្នកស្រី ស ស៊ន ឲ្យដឹងថា នៅថ្ងៃចន្ទនេះសហគមន៍របស់អ្នកស្រីក៏ទៅធ្វើយុទ្ធនាការអាវខ្មៅមុខតុលាការនៅរសៀលថ្ងៃនេះដែរ ដោយថាដើម្បីចូលរួមគាំទ្រសមាជិករបស់ខ្លួនដែលតុលាការសាកសួរនោះដែរ។
ពលរដ្ឋសហគមន៍សហគមន៍បឹងកក់និងសហគមន៍បុរីកីឡា តែងតែធ្វើយុទ្ធការអាវខ្មៅនៅសហគន៍របស់ពួកគេជារៀងរាល់ថ្ងៃចន្ទ ដើម្បីទាមទារឲ្យដោះលេងមន្រ្តីសិទ្ធិមនុស្ស មន្រ្តី គ.ជ.ប តំណាងរបស់ពួកគេគឺអ្នកស្រី ទេព វន្នី និងរកយុត្តិធម៌ជូនលោកបណ្ឌិត កែម ឡី។
ថ្ងៃចន្ទ ទី២៤ ខែតុលា នេះជាសប្តាហ៍ទី២៥ហើយ ដែលសកម្មជនដីធ្លី សង្គមស៊ីវិល និងប្រជាពលរដ្ឋធ្វើយុទ្ធនាការអាវខ្មៅ ដើម្បីទាមទារឲ្យដោះលែងមន្ត្រីសិទ្ធិមនុស្សអាដហុក៤រូប មន្ត្រី គ.ជ.ប លោក នី ចរិយា សកម្មជនបឹងកក់អ្នកស្រី ទេព វន្នី និងទាមទារឲ្យរកយុត្តិធម៌ករណីសម្លាប់ លោក កែម ឡី៕
