ស្ថានទូតអាមេរិកប្រចាំទីក្រុងម៉ានីល បានឲ្យដឹងថា អ្នកកាទូតជាន់ខ្ពស់អាមេរិកទទួលបន្ទុកតំបន់អាស៊ី ដែលបានធ្វើដំណើរទៅដល់ប្រទេសហ្វីលីពីនហើយនោះ នឹងជួបជាមួយប្រមុខកាទូតហ្វីលីពីននៅថ្ងៃនេះ ចំពេលដែលមានយល់ច្រឡំអំពីស្ថានភាពទំនាក់ទំនងរវាងប្រទេសទាំងពីរ ដែលជាសម្ព័ន្ធមិត្តចាស់វស្សាជាមួយគ្នា។
ព័ត៌មានស្ដីគម្រោងជួបគ្នានេះ ត្រូវបានរាយការណ៍ដោយទីភ្នាក់ងារព័ត៌មាន Reuters ដែលបានដកស្រង់សេចក្ដីប្រកាសព័ត៌មានរបស់ក្រសួងការបរទេសអាមេរិក។
ក្រសួងការបរទេសអាមេរិកប្រកាសថា ដំណើរទស្សនកិច្ចរបស់លោក Daniel Russel ជំនួយការរដ្ឋមន្ត្រីការបរទេសអាមេរិកទទួលបន្ទុកកិច្ចការអាស៊ីខាងកើត និងប៉ាស៊ីហ្វិក គឺជាផ្នែកមួយនៃដំណើរទៅកាន់ប្រទេស ៣ នៅតំបន់អាស៊ីអាគ្នេយ៍ ក្នុងនោះមានប្រទេសថៃ និងកម្ពុជាផងដែរ។
ដំណើររបស់លោក Russel ទៅកាន់ហ្វីលីពីន កើតឡើងចំពេលមានមានការភាន់ច្រឡំអំពីទំនាក់ទំនងរវាងក្រុងម៉ានីល និងក្រុងវ៉ាស៊ីងតោន បន្ទាប់ពីប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានប្រកាសពីការ “ចែកផ្លូវ”ពីអាមេរិក មុននឹងលោកកែសម្ដីកាលពីចុងសប្ដាហ៍នេះថា អាមេរិកនៅតែជា “មិត្តជិតស្និទ្ធបំផុត”របស់ហ្វីលីពីន។
អាមេរិក គឺជាដៃគូពាណិជ្ជកម្មធំបំផុតរបស់ហ្វីលីពីន និងជាសម្ព័ន្ធមិត្តជិតស្និទ្ធផ្នែកសន្តិសុខអស់រយៈពេលប្រហែល ៧០ឆ្នាំមកហើយ៕
