ក្រសួងពាណិជ្ជកម្មអាមេរិក បានប្រកាសកាលពីថ្ងៃម្សិលមិញថា កំណើនសេដ្ឋកិច្ចអាមេរិក មានសន្ទុះ ២.៩ភាគរយ នៅក្នុងត្រីមាសទី ៣ ក្នុងឆ្នាំនេះ ដោយសារកំណើនយ៉ាងខ្លាំងក្លាផ្នែកនាំចេញ និងការចំណាយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ខណៈដែលការបោះឆ្នោតជ្រើសរើសប្រធានាធិបតីនៅពេល ១១ថ្ងៃទៀតនោះ តួលេខផលិតផលក្នុងស្រុកសរុបអាមេរិក បានបង្ហាញនូវកំណើនដ៏ខ្លាំងក្លានៅក្នុងរយៈពេល ២ឆ្នាំមកនេះ ហើយមានសន្ទុះលើសពីការព្យាករទុកចំនួន ២.៥ភាគរយទៅទៀត។
អ្នកស្រី ហ៊ីលឡារី គ្លីនតុន បេក្ខនារីប្រធានាធិបតីបក្សប្រជាធិបតេយ្យ បានចាត់ទុករបាយការណ៍នេះ ជាភស្តុតាងនៃការរីកលូតលាស់ដែលសម្រេចបានក្នុងការងើបចេញវិបត្តិហិរញ្ញវត្ថុ ហើ់យនិយាយថា អ្នកស្រីមានផែនការបង្កើតការងារទំហំធំ តាមរយៈការវិនិយោគផ្នែកហេដ្ឋារចនាសម្ព័ន្ធ។
AFP បានផ្សាយថា លោក ដូណាល់ ត្រាំ បេក្ខជនប្រធានាធិបតីបក្សសាធារណរដ្ឋ នៅមិនទាន់បញ្ចេញយោបល់អ្វីទៅលើរបាយការណ៍កំណើនសេដ្ឋកិច្ចនេះនៅឡើយទេ ប៉ុន្តែ លោក ត្រាំ បានចោទប្រកាន់ម្ដងហើយម្ដងទៀតថា សេដ្ឋកិច្ចអាមេរិក “បាក់បែក” ហើយថា សំណើរបស់លោក នឹងជួយជំរុញសន្ទុះកំណើនសេដ្ឋកិច្ច។
កំណើនសេដ្ឋកិច្ចរឹងមាំបែបនេះ អាចនឹងបង្កើនសម្ពាធទៅលើធនាគារកណ្ដាល ឲ្យដំឡើងអត្រាការប្រាក់នៅឆ្នាំនេះ បន្ទាប់ពីអត្រាការប្រាក់មិនត្រូវបានគេផ្លាស់ប្ដូរចាប់តាំងពីខែធ្នូ ឆ្នាំ២០១៥កន្លងមក៕