សកម្មជនមួយចំនួនដែលសកម្មក្នុងការធ្វើយុទ្ធនាការអាវខ្មៅសុំដោះលែងអ្នកជាប់ឃុំនោះ នៅថ្ងៃចន្ទទី៣១ តុលានេះ បានបន្តធ្វើយុទ្ធនាការនៅក្នុងសហគមន៍របស់ពួកគេទៀត បន្ទាប់ពីផ្អាកមួយរយៈ ដោយសារតុលាការកោះហៅសមាជិករបស់ពួកគេសាកសួរ។
សកម្មជនដីធ្លីនៅសហគមន៍បឹងកក់ប្រមាណ៣០នាក់ថ្ងៃចន្ទនេះ បានធ្វើយុទ្ធនាការអាវខ្មៅនៅក្នុងសហគមន៍របស់ពួកគេ ដើម្បីទាមទារឲ្យដោះលែងមន្រ្តីសិទ្ធិមនុស្ស មន្រ្តី គ.ជ.ប និងតំណាងរបស់ពួកគេគឺអ្នកស្រី ទេព វន្នី ដោយបាននាំគ្នាឈរលើកបដារូបថតអ្នកជាប់ឃុំទាំងនោះនិងស្រែកទាមទារឲ្យរដ្ឋាភិបាលដោះលែងអ្នកជាប់ឃុំទាំងនោះឲ្យមានសេរីភាពវិញ។
តំណាងពលរដ្ឋសហគន៍បឹងកក់ កញ្ញា សុង ស្រីលាភ លើកឡើងថា អ្នកជាប់ឃុំទាំងនោះមិនមានកំហុសដូចការចោទប្រកាន់របស់តុលាការនោះទេ។
កញ្ញាបន្តថា ការចាប់ខ្លួនអ្នកស្រី ទេព វន្នី ដោយសារតែអ្នកស្រី ទេព វន្នី សកម្មក្នុងការចេញមុខតវ៉ាទាមរកដំណោះស្រាយដីធ្លីនៅតំបន់បឹងកក់។
កញ្ញាថាបន្ថែមថា៖ «គាត់ធ្វើជាតួនាទីក្នុងនាមជាអង្គការសង្គមស៊ីវិលក្រៅរដ្ឋាភិបាល ដើម្បីជួយដល់ពលរដ្ឋដែលរងគ្រោះ គ្មានលទ្ធិភាពទៅរកក្រសួង ទៅរដ្ឋាភិបាលឲ្យជួយ បែរជាមិនព្រមជួយ អញ្ចឹងដល់ប្រជាពលរដ្ឋមករកអង្គការសង្គមស៊ីវិលជួយ ពួកគេគាត់ក៏ត្រូវរងការចោទប្រកាន់ដែរ នេះជារឿងមួយដែលអយុត្តិធម៌បំផុត»។
ចំណែកពលរដ្ឋសហគមន៍បុរីកីឡានៅថ្ងៃនេះក៏បានបន្តនាំគ្នាធ្វើយុទ្ធនាការអាវខ្មៅ ដើម្បីទាមទារឲ្យដោះលេងមន្រ្តីសិទ្ធិមនុស្សអាដហុក មន្រ្តី គ.ជ.ប និងអ្នកស្រី ទេព វន្នី និងរកយុត្តិធម៌ជូនលោកបណ្ឌិត កែម ឡី ផងដែរ។ ពួកគេបាននាំឈរកាន់បដានិងរូបថតអ្នកជាប់ឃុំទាំងនោះ តែមិនមានសន្តិសុខខណ្ឌមករារាំងនោះទេ។
អ្នកស្រីបន្ថែមថាបន្ថែមថា៖ «ទាមទារសុំឲ្យដោះលែងមន្រ្តីសិទ្ធិមនុស្ស មន្រ្តី គ.ជ.ប លោក នី ចរិយ៉ា និងអ្នកស្រី ទេព វន្នី ហើយនឹងឲ្យអាជ្ញាធរបង្ហាញកាម៉ារ៉ានៅការ៉ាស់សាំងកាលតិច ពួកមីងបន្តតវ៉ានេះ ដោយសារពួកមីងមើលឃើញសកម្មភាពរបស់ពួកគាត់[អ្នកជាប់ឃុំ]សុទ្ធតែល្អ អ្នកការពារសិទ្ធិមនុស្ស ការពារអ្នកក្រីក្រ ជួយអ្នកក្រីក្រ ចំណែកលោក កែម ឡី គាត់វិភាគត្រឹមត្រូវ មិននិយាយពន្លឿសដូចខាងរដ្ឋាភិបាល»។
ថ្ងៃចន្ទ ទី៣១ ខែតុលា នេះជាសប្តាហ៍ទី២៦ហើយ ដែលសកម្មជនដីធ្លី សង្គមស៊ីវិល និងប្រជាពលរដ្ឋធ្វើយុទ្ធនាការអាវខ្មៅ ដើម្បីទាមទារឲ្យដោះលែងមន្ត្រីសិទ្ធិមនុស្សអាដហុក៤រូប មន្ត្រី គ.ជ.ប លោក នី ចរិយា សកម្មជនបឹងកក់អ្នកស្រី ទេព វន្នី និងទាមទារឲ្យរកយុត្តិធម៌ករណីសម្លាប់ លោក កែម ឡី៕
