ប្រទេសអូស្ត្រាលី និងចិន នៅថ្ងៃនេះ បានឯកភាពគ្នាក្នុងការចែករំលែកព័ត៌មានចារកម្មអំពីបទល្មើសហិរញ្ញវត្ថុធំៗ ដែលជាផ្នែកមួយនៃការបង្ក្រាបទៅលើឧក្រិដ្ឋកម្មលាងលុយឆ្លងដែន និងការផ្ដល់លុយទៅដល់ចលនាភេរវកម្ម។
ទីភ្នាក់ងារព័ត៌មាន Reuters ថា ការឯកភាពរវាងប្រទេសទាំងពីរបានកើតឡើងអំឡុងពេលរដ្ឋមន្ត្រីយុត្តិធម៌អូស្ត្រាលី លោក Michael Keenan កំពុងស្ថិតក្នុងដំណើរបំពេញទស្សនកិច្ចនៅទីក្រុងប៉េកាំង។
លោក Keenan បានប្រាប់អ្នកយកព័ត៌មានថា អំឡុងដំណើរទស្សនកិច្ចនេះ លោកបានលើកឡើងផងដែរ ពីក្ដីបារម្ភនានាជាមួយក្រុមមន្ត្រីចិន ជុំវិញការឃុំខ្លួនជនជាតិអូស្ត្រាលី ៤រូប ទាក់ទងនឹងបទល្មើសល្បែងស៊ីសង ពាក់ព័ន្ធនឹងក្រុមហ៊ុន Crown Resort ប៉ុន្តែ លោកពុំបានពិភាក្សាលម្អិតអំពីការចោទប្រកាន់នោះទេ។
កិច្ចព្រមព្រៀងចែករំលែកព័ត៌មានចារកម្មរវវាងទីភ្នាក់ងារចារកម្មហិរញ្ញវត្ថុអូស្ត្រាលី និងសមភាគីចិន នឹងអនុញ្ញាតឲ្យប្រទេសទាំងពីរ កំណត់មុខសញ្ញា និងកាត់ផ្ដាច់បណ្ដាញឧក្រិដ្ឋកម្មមានអង្គការចាត់តាំង៕
