ទីភ្នាក់ងារព័ត៌មាន Reuters ដែលបានដកស្រង់សម្ដីពីមន្ត្រីយោធាជាន់ខ្ពស់ថៃ បានផ្សាយថា ប្រទេសនេះនឹងរៀបចំពិធីសោយរាជ្យសម្បត្តិរាជទាយាទ មហា វិជ្ជរ៉ាឡុងកន នៅថ្ងៃទី០១ ខែធ្នូ។
ការសោយទិវង្គតព្រះមហាក្សត្រថៃ ភូមិបុល អាដុលយ៉ាតេជ កាលពីថ្ងៃទី១៣ ខែតុលាកន្លងមកនេះ បានទាញប្រជាជនថៃទូទាំងប្រទេស ឲ្យកាន់ទុក្ខរយៈពេល ១ឆ្នាំ។
ប្រភពពីមន្ត្រីយោធាជាន់ខ្ពស់ បានប្រាប់ Reuters ថា ដំណឹងនៃពិធីសោយរាជ្យសម្បត្តិព្រះមហាក្សត្រថ្មីនេះ បានកើតឡើងបន្ទាប់ពីព្រះរាជទាយាទចាកចេញទៅកាន់ប្រទេសអាល្លឺម៉ង់ នៅចុងសប្ដាហ៍កន្លងមកនេះ ជាទីដែលទ្រង់មានកិច្ចការផ្ទាល់ខ្លួន ប៉ុន្តែ ទ្រង់នឹងវិលត្រឡប់ទៅប្រទេសថៃវិញ នៅក្នុងខែវិច្ឆិកានេះ។
នាយករដ្ឋមន្ត្រីថៃ លោក ប្រាយុទ្ធ ចាន់អូចា ធ្លាប់បាននិយាយថា ពិធីឡើងសោយរាជ្យសម្បត្តិផ្លូវការរបស់ព្រះអង្គម្ចាស់ មហា វិជ្ជរ៉ាឡុងកន អាចធ្វើឡើងក្នុងរយៈពេល ៧ ទៅ ១៥ថ្ងៃ ក្រោយការសោយទិវង្គតព្រះមហាក្សត្រ ភូមិបុល៕
