សមាជិកសភា ២រូប ដែលចង់ឲ្យហុងកុងបំបែកខ្លួនចេញពីចិននោះ បានប៉ះទង្គិចគ្នាជាមួយសន្តិសុខនៅក្នុងសភា នៅថ្ងៃនេះ ដោយសមាជិកសភាម្នាក់ ត្រូវបានគេទាញទម្លាក់ចេញពីអាសនៈ ខណៈមានក្ដីបារម្ភថា ក្រុងប៉េកាំងនឹងលូកដៃចូលកិច្ចការទីក្រុងហុងកុង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា មានក្ដីបារម្ភយ៉ាងខ្លាំងថា ប្រទេសចិនកំពុងតែរឹតបន្តឹងកណ្ដាប់ដៃរបស់ខ្លួនទៅលើទីក្រុងពាក់កណ្ដាលស្វយ័តមួយនេះ ដែលបញ្ឆេះឲ្យមានចលនាចង់បានឯករាជ្យ។
ស្ថិតក្នុងស្ថានភាពច្របូកច្របល់នៅក្នុងសភា ៣សប្ដាហ៍ជាប់គ្នា សមាជិកសភាចង់បានឯករាជ្យ លោក Baggio Leung និងអ្នកស្រី Yau Wai-ching បានដើរចូលសាលប្រជុំសភា ប៉ុន្តែ អ្នកទាំងពីរ ត្រូវបានគេហាមឃាត់មិនឲ្យចូលសាលប្រជុំសភា ដោយរង់ចាំលទ្ធផលនៃការត្រួតពិនិត្យពីខាងតុលាការថា តើពួកគេអាចទទួលអាសនៈរបស់ពួកគេឬយ៉ាងណា។
អ្នកស្រី Yau បានរត់សំដៅទៅកាន់តុនៅខាងមុខសាលប្រជុំសភា និងអានលិខិតស្បថចូលកាន់តំណែងរបស់អ្នកស្រី។ ភ្លាមៗនោះ ក្រុមស្ត្រីដែលជាសមាជិកសន្តិសុខ បានឡោមព័ទ្ធអ្នកស្រី Yau និងបានលើកអ្នកស្រីចេញពីសាលប្រជុំសភា នៅពេលអ្នកស្រីព្យាយាមក្រាញននៀល។
ចំណែកលោក Baggio ត្រូវបានក្រុមសមាជិសភាចង់បានឯករាជ្យដទៃទៀត រោមជុំជិត និងរុញច្រានកម្លាំងសន្តិសុខចេញ។
កិច្ចប្រជុំសភា ត្រូវបានបិទបញ្ចប់ បន្ទាប់ពីក្រុមសន្តិសុខពុំអាចបណ្ដេញលោក Baggio ចេញពីសាលប្រជុំសភាបាន៕
