ទីភ្នាក់ងារព័ត៌មានអន្តរជាតិ បានផ្សាយថា ការិយាល័យប្រធានាធិបតីកូរ៉េខាងត្បូង នៅថ្ងៃនេះ បានតែងតាំងនាយករដ្ឋមន្ត្រី និងរដ្ឋមន្ត្រីហិរញ្ញវត្ថុថ្មី ដែលជាការរុះរើធំបំផុតចាប់តាំងពីរដ្ឋបាលរបស់ប្រធានាធិបតី អ្នកស្រី Park Geun-hye បានរងការវាយប្រហារពីរឿងអាស្រូវជុំវិញមិត្តជិតស្និទ្ធម្នាក់បានលូកលាន់ចូលកិច្ចការរដ្ឋ។
វិមានខៀវ បាននិយាយថា ខ្លួនបានតែងតាំងប្រធានគណៈកម្មការសេវាកម្មហិរញ្ញវត្ថុ លោក Yim Jong-yong ជារដ្ឋមន្ត្រីហិរញ្ញវត្ថុថ្មី និងជាឧបនាយករដ្ឋមន្ត្រី។ លោក Yim ដែលនឹងឡើងជំនួសរដ្ឋមន្ត្រីហិរញ្ញវត្ថុបច្ចុប្បន្ន លោក YooIl-ho នោះ គឺជាបុគ្គលទទួលបានការគោរពពីក្រុមអ្នកបង្កើតគោលនយោបាយ និងអ្នកចូលរួមក្នុងទីផ្សារ នៅក្នុងតួនាទីរបស់លោកនាពេលបច្ចុប្បន្ន។
ចំណែកលោក Kim Byong-joon អតីតលេខាធិការជាន់ខ្ពស់អំឡុងរដ្ឋបាលលោកប្រធានាធិបតី Roh Moo-hyun នោះ ត្រូវបានតែងតាំងជានាយករដ្ឋមន្ត្រីថ្មី ជំនួសលោក Hwang Kyo-ahn។ តួនាទីនាយករដ្ឋមន្ត្រីនៅកូរ៉េខាងត្បូង គឺជាតំណែងរដ្ឋបាល។
ការសម្រេចបែបនេះ ត្រូវបានគេមើលឃើញថា ជាកិច្ចខិតខំប្រឹងប្រែងដើម្បីលួងលោមកំហឹងមហាជន ជុំវិញរឿងអាស្រូវអ្នកស្រី Choi Soon-sil មិត្តភក្តិរបស់ប្រធានាធិបតីកូរ៉េខាងត្បូង ដែលត្រូវបានសមត្ថកិច្ចចាប់ខ្លួន និងស្ថិតក្រោមការស៊ើបអង្កេតពីសំណាក់ក្រុមរដ្ឋអាជ្ញា៕
