ព្រះរាជអាជ្ញាកូរ៉េខាងត្បូង បានឃុំខ្លួន អតីតទីប្រឹក្សាប្រធានាធិបតីកូរ៉េខាងត្បូងលោកស្រី ប៉ាឃៀនហេ កាលពីយប់ថ្ងៃពុធម្សិលមិញ គឺជាមនុស្សទី២ដែលស្និទ្ធនឹងប្រធានាធិបតីត្រូវបានឃុំខ្លួន ពាក់ព័ន្ធរឿងអាស្រូវនយោបាយ។
ព្រះរាជអាជ្ញាបានថ្លែងថា ពួកគេកំពុងតែស្វែងរក ភស្តុតាងបន្ថែមដើម្បីចោទប្រកាន់អតីតទីប្រឹក្សាជាន់ខ្ពស់របស់លោកស្រី ប៉ាក ឃឿនហេ លោក An Chong-bum ដែលរងការចោទថា ប្រើរូបភាពជាមនុស្សស្និទ្ធជាមួយប្រធានាធិបតី ប្រមូលមូលនិធិផ្សេងៗ ដើម្បីជាថ្នូជួយឲ្យអ្នកទាំងនោះភ្ជាប់ទំនាក់ទំនងជាមួយប្រធានាធិបតី។ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋកូរ៉េខាងត្បូងយ៉ុងហាប់។
An គឺជាទីប្រឹក្សាជាន់ខ្ពស់របស់ប្រធានាធិបតី ហើយបានលាលែងពីតំណែងកាលពីខែមុន បន្ទាប់មានបញ្ហានយោបាយនៅក្នុងប្រទេសនេះ។ នៅក្នុងច្បាប់កូរ៉េខាងត្បូងគឺ សមត្ថកិច្ចអាចឃាត់ខ្លួនលោក An ៤៨ម៉ោង មុនពេលមានដីកាពីតុលាការ។
កាលពីថ្ងៃពុធ ព្រះរាជអាជ្ញាបានស្នើដីកាពីតុលាការ ដើម្បីឃុំខ្លួនលោកស្រី Choi Soon-sil មិត្តរបស់លោកស្រីប៉ាក ឃៀនហេ ក្នុងបទចោទពីការរំលោភអំណាច និង រឿងអាស្រូវនយោបាយដូចគ្នានេះដែរ។
ដោយសារបញ្ហាបន្តបន្ទាប់នេះ លោក ស្រីប៉ាក ឃៀន ហេ បានប្រកាសរុះរើគណៈរដ្ឋមន្ត្រីកាលពីម្សិលមិញ។ ចំណែកគណបក្សប្រឆាំងនៅកូរ៉េខាងត្បូងក៏ជំរុញឲ្យព្រះរាជអាជ្ញាបើកការស៊ើបអង្កេតលើលោក ស្រី ប៉ាកឃឿនហេផងដែរ។
