រដ្ឋាភិបាលមីយ៉ាន់ម៉ា អនុញ្ញាតក្នុងការជ្រើសរើសមន្ត្រីទូតជាច្រើន ឲ្យទៅមើលកន្លែងដែលវាយប្រហារដោយពួកភេរវករនៅក្នុងទីក្រុងមូងដ ស្ថិតនៅក្នុងរដ្ឋរ៉ាក់ឃីន កាលពីថ្ងៃពុធម្សិលមិញ។
សកម្មភាពនេះកើតឡើងបីសប្តាហ៍ក្រោយពេលមានការវាយប្រហារដោយពួកបះបោរនៅទីតាំងបីកន្លែងនៃប៉ុស្តិ៍នគរបាលយាមព្រំដែននៅតំបន់ភាគខាងជើង។ នេះបើតាមការចុះផ្សាយរបស់សារព័ត៌មាន Channel News Asia។
របាយការណ៍របស់សមត្ថកិច្ចបង្ហាញថា ការវាយប្រហារនៅពេលនេះ បានសម្លាប់មនុស្សអស់ជាង១០នាក់ ក្រោយមកសមត្ថកិច្ចឃាត់ខ្លួនមនុស្សជាង៥០នាក់ ដែលសង្ស័យពាក់ព័ន្ធករណីនេះ។
រដ្ឋាភិបាលមីយ៉ាន់ម៉ាបានចេញសេចក្តីថ្លែងការណ៍ថ្កោលទោស ពួក Aqa Mul Mujahidin និង Rohingya Solidarity ថាជាអ្នកស្ថិតនៅពីក្រោយការវាប្រហារនោះ។ ប៉ុន្តែតាំងពីការអះអាងនោះមកនិងមានការឃាត់ខ្លួនជនសង្ស័យប្រមាណ៥០នាក់នោះ សមត្ថកិច្ចមិនទាន់រកឃើញភស្តុតាងបន្ថែម ដើម្បីបញ្ជាក់លើការចោទប្រកាន់នោះទេ។
មន្ត្រីទូតដែលរដ្ឋាភិបាលមីយ៉ាន់ម៉ាអញ្ជើញនោះមានជាង១០រួមមាន ទូតសហភាពអឺរ៉ុប អាមេរិក អង់គ្លេស ឥណ្ឌូនេស៊ី ឥណ្ឌា និងចិនជាដើម។
ចំណែកគណៈប្រតិភូអង្គការសហប្រជាជាតិនិងអ្នកសម្របសម្រួលសិទ្ធិមនុស្សផ្សេងៗទៀតនៅក្នុងប្រទេស មីយ៉ាន់ម៉ា ក៏ត្រូវបានអញ្ជើញឲ្យចូលរួមទស្សនកិច្ចមើលកន្លែងរងការវាយប្រហារនេះដែរ។
ការរៀបចំដំណើរទស្សនកិច្ចនេះ បន្ទាប់ពីមានយុទ្ធនាការដាក់សម្ពាធកើនឡើងពីសហគមន៍អន្តរជាតិ ដែលអំពាវនាវឲ្យរដ្ឋាភិបាលមីយ៉ាន់ម៉ា បើកចំហសិទ្ធិសេរីភាពក្រុមអ្នកឃ្លាំមើលឯករាជ្យ ទីភ្នាក់ងារ និងអ្នកសារព័ត៌មាន អាចទៅពិនិត្យមើលនៅកន្លែងវាយប្រហារនៅស្រុក Maungdaw៕