តុលាការកំពូលបានច្រានចោលបណ្តឹងសារទុក្ខសំណុំរឿងពាក់ព័ន្ធនឹងការបដិសេធចូលខ្លួន ក្នុងនាមជាសាក្សី របស់ប្រធានស្តីទីគណបក្សសង្គ្រោះជាតិ លោក កឹម សុខា ដោយថាសំណើរនោះមិនមានហេតុផលត្រឹមត្រូវ។
តុលាការកំពូលនៅព្រឹកថ្ងៃទី៤ ខែវិច្ឆិកា បានចេញដីកាប្រកាសបដិសេធសំណើរបស់ក្រុមមេធាវីការពារក្តីឲ្យលោក កឹម សុខា ដែលស្នើសុំមោឃភាពនៃនីតិវិធីសភាស៊ើបសួរសាលាឧទ្ធរណ៍ ដោយថានឹងបន្តរក្សាសាលដីកាសភាស៊ើបសួរសាលាឧទ្ធរណ៍ទុកជាបានការដដែល។
ភ្លាមៗ VOD មិនអាចសុំការបំភ្លឺជុំវិញករណីនេះ ពីក្រុមមេធាវីការពារក្តីឲ្យលោក កឹម សុខា បានទេនៅព្រឹកនេះ ខណៈមេធាវីទំាងនោះកំពុងជាប់សវនាការនៅសាលាឧទ្ធរណ៍លើរឿង លោក កឹម សុខា ផងដែរ។
កន្លងមកក្រុមមេធាវីការពារក្ដីលោក កឹម សុខា ដាក់ពាក្យបណ្ដឹងសាទុក្ខទៅតុលាការកំពូល ឲ្យពិនិត្យមើលនីតិវិធីនៃការស៊ើបសួររបស់ចៅក្រមស៊ើបសួរ និងព្រះរាជអាជ្ញាសាលាដំបូងរាជធានីភ្នំពេញ ដោយពួកគេថា ការចោទប្រកាន់កូនក្ដីរបស់ពួកគេ ត្រូវបានធ្វើឡើងដោយខុសនីតិវិធីច្បាប់ ខណៈដែលកូនក្ដីរបស់ពួកគេមានអភ័យឯកសិទ្ធិតំណាងរាស្ត្រនិងមិនបានប្រព្រឹត្តបទល្មើសជាក់ស្ដែងនោះទេ។
លោក កឹម សុខា បាននិងកំពុងស្នាក់នៅក្នុងទីស្នាក់ការគណបក្សនៅសង្កាត់ចាក់អង្រែលើអស់រយៈពេលជិត ៥ខែមកហើយនោះ បន្ទាប់ពីមានការប៉ុនប៉ងចាប់ខ្លួនលោកមិនបានសម្រេចពីសំណាក់សមត្ថកិច្ចកាលពីចុងខែឧសភាកន្លងមក ក្រោយពីលោកបដិសេធចូលបំភ្លឺក្នុងតុលាការជាបន្តបន្ទាប់ ពាក់ព័ន្ធនឹងសំណុំរឿងអាស្រូវស្នេហាជាមួយកញ្ញា ខុម ចាន់តារាទី ហៅ ស្រីមុំ៕
