ការនាំចេញរបស់ប្រទេសចិន បានធ្លាក់ចុះ ៧.៣ភាគរយ កាលពីខែតុលាកន្លង មកនៅត្រឹមទំហំ ១៧៨.២ពាន់លានដុល្លារប៉ុណ្ណោះ បើធៀបទៅនឹងខែតុលាឆ្នាំ២០១៥កន្លងមក។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់តួលេខពន្ធគយចិននៅថ្ងៃនេះ ខណៈដែលតម្រូវការសេដ្ឋកិច្ចសកល ពឹងផ្អែកទៅលើមហាអំណាចសេដ្ឋកិច្ចលំដាប់ទី២ពិភពលោកមួយនេះ។
ទិន្នន័យពន្ធគយ បានបង្ហាញថា ការនាំចូលរបស់ចិន បានធ្លាក់ចុះ ១.៤ភាគរយ មកនៅត្រឹមទំហំ ១២៩.១ពាន់លានដុល្លារ អំឡុងខែតុលាកន្លងមក ខណៈដែលអតិរេកពាណិជ្ជកម្ម បានធ្លាក់ចុះមកនៅត្រឹម ៤៩.១ពាន់លានកាលពីខែមុននេះ។
AFP បានកត់សម្គាល់ថា ទំហំការនាំចេញចិនបានធ្លាក់ចុះ ៧ខែជាប់ៗគ្នា ហើយទាំងការនាំចេញ និងនាំចូល សុទ្ធតែស្ថិតនៅក្រោមការរំពឹងទុក ដោយក្រុមសេដ្ឋវិទូព្យាករទុកថា ការនាំចូលនឹងធ្លាក់ចុះ ៦ភាគរយ ហើយការនាំចេញធ្លាក់ចុះ ១ភាគរយ។
ចិនគឺជាប្រទេសនាំចេញទំនិញធំបំផុតនៅលើពិភពលោក ហើយដំណើររីកលូតលាស់នៃពាណិជ្ជកម្មរបស់ចិន ជះឥទ្ធិពលទៅដល់ដៃគូពាណិជ្ជកម្មនានា ចាប់ពីអូស្ត្រាលីរហូតដល់ប្រទេសហ្ស៊ីមបាវ៉េ៕
