ប្រទេសម៉ាឡេស៊ីបានស្នើដំឡើងអាយុអប្បបរមាដល់ ១៨ឆ្នាំ សម្រាប់នារីមូស្លីម ក្នុងបំណងកាត់បន្ថយអត្រាមានផ្ទៃពោះនៅក្នុងចំណោមយុវជន និងជួយដោះស្រាយការការពារសង្គមកិច្ចសម្រាប់កុមារ។ នេះដោយយោងតាមការផ្សាយរបស់សារព័ត៌មាន Channel News Asia។
បើតាមសារព័ត៌មានសិង្ហបុរីនេះ អ្នកស្រី Rohani Abdul Karim រដ្ឋមន្ត្រីក្រសួងកិច្ចការនារី គ្រួសារ និងអភិវឌ្ឍន៍សហគមន៍ បានថ្លែងថា ក្រសួងបានទាក់ទាញភាគីជាច្រើនក្នុងនោះមានទាំងអាជ្ញាធរផ្នែកកិច្ចការសាសនាផងដែរ ឲ្យយល់ព្រមទៅលើសំណើកែប្រែច្បាប់អាពាហិ៍ពិពាហិ៍ និងការលែងលះ។
នៅក្នុងប្រទេសម៉ាឡេស៊ី នារីមូស្លីមអាយុក្រោម ១៦ឆ្នាំ ត្រូវតែទទួលបានការអនុញ្ញាតិពីតុលាការអ៊ីស្លាមដើម្បីរៀបអាពាហិ៍ពិពាហិ៍ ប៉ុន្តែ ក្រុមសកម្មជនសិទ្ធិកុមារនិយាយថា ការអនុញ្ញាតបែបនេះ ពិតជាងាយស្រួលពេកហើយ។ ប្រព័ន្ធបែបនេះ ត្រូវបានអ្នកដែលរៀបការជាមួយជនរងគ្រោះជាអនីតិជន រំលោភបំពានដោយមិនមានទោសទណ្ឌ។
រដ្ឋមន្ត្រីរូបនេះ បានថ្លែងដូច្នេះនៅឯវេទិកាសិទ្ធិកុមារមួយរៀបចំឡើងដោយអង្គការ UNCEF នៅទីក្រុងគួឡាឡំពួរ។ ក្រុមការងារពិសេសមួយដឹកនាំដោយរដ្ឋមន្ត្រីច្បាប់របស់ម៉ាឡេស៊ី ត្រូវបានគេបង្កើតឡើង ដើម្បីស្វែងរកការកែប្រែច្បាប់នេះ៕
