គ្រឹះស្ថានអង្គរ ដែលជាស្ថាប័នរដ្ឋគ្រប់គ្រងទៅលើការលក់សំបុត្រចូលទស្សនាតំបន់ទេសចរណ៍អង្គរ បានឲ្យដឹងថា ចំនួនភ្ញៀងទេសចរបរទេសចូលទស្សនារមណីយដ្ឋានមួយនេះ បានកើនឡើង ៧.៩ភាគរយ កាលពីខែតុលាកន្លងមក បើធៀបទៅនឹងរយៈពេលដូចគ្នាក្នុងឆ្នាំ២០១៥កន្លងមក។
យោងតាមសេចក្ដីប្រកាសព័ត៌មានកាលពីដើមខែវិច្ឆិកានេះ បានបង្ហាញថា ចំនួនភ្ញៀវទេសចរបរទេស ដែលបានទិញសំបុត្រចូលទស្សនាតំបន់អង្គរកាលពីខែតុលាកន្លងមកនេះ មានចំនួន ១៦៥,៥៤៨នាក់ ដោយបានកើនឡើង ៧.៩៨ភាគរយ និងផ្ដល់ចំណូលពីការលក់សំបុត្របានជាង ៤លាន ៤៨ម៉ឺនដុល្លារ ឬកើនឡើង ៦.៩ភាគរយ បើធៀបនឹងខែតុលាឆ្នាំ២០១៥កន្លងមក។
គ្រឹះស្ថានអង្គរ បានឲ្យដឹងទៀតថា ចំនួនភ្ញៀវទេសចរបរទេសចូលទស្សនាតំបន់អង្គររយៈពេល ១០ខែកន្លងមកនេះ មានចំនួនជាង ១លាន ៧២ម៉ឺននាក់ ឬកើនឡើងជាង ៣ភាគរយ ដោយផ្ដល់ចំណូលថវិកាជាង ៤៩លានដុល្លារ ឬកើនឡើងជិត ៣ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០១៥កន្លងមក៕