ក្រសួង​សុខាភិបាល​បានរកឃើញបុរស​ម្នាក់កើតជំងឺហ្ស៊ីកានៅកំ​ពង់ចាម

មូសខ្លាដែលបង្កឲ្យមានការឆ្លងមេរោគZika (រូបភាពពីសារព័ត៌មាន Channel News Assia)

ក្រសួងសុខាភិបាលបានប្រកាសថា បុរសម្នាក់វ័យជាង៤០ឆ្នាំ រស់នៅក្នុងស្រុកកំពង់សៀម ខេត្តកំពង់ចាម បានកើតជំងឺហ្ស៊ីកា ដែលនេះជាករណីទី១ហើយក្រសួងបានរកឃើញកើតមានសម្រាប់ឆ្នាំ២០១៦នេះ។

សេចក្តីប្រកាសព័ត៌មានរបស់ក្រសួងកាលពីថ្ងៃទី១៨ខែវិច្ឆិកា បញ្ជាក់ថា ដំបូងឡើយ បុរសវ័យ ៤៤ ឆ្នាំនេះបានទៅសម្រាកព្យាបាលនៅមន្ទីរពេទ្យបង្អែកខេត្តកំពង់ចាមកាលពីថ្ងៃទី ១៤ ខែតុលា ឆ្នាំ២០១៦ ក្នុងស្ថានភាពសង្ស័យថាមានជំងឺគ្រុនឈាម។ លោកត្រូវបាន ក្រុមគ្រូពេទ្យធ្វើតេស្តឈាមរកវីរុសគ្រុនឈាម ប៉ុន្តែលទ្ធផលបានបញ្ជាក់ថាអវិជ្ជាមាន មានន័យថាលោកមិនមានជំងឺគ្រុនឈាមនោះទេ។

ក្រោយមក លោកត្រូវបានវិទ្យាស្ថានប៉ាស្ទ័រកម្ពុជាធ្វើតេសរកវីរុសហ្ស៊ីការវិញម្តង និងទទួលបានលទ្ធផលបញ្ជាក់ថាលោកមានផ្ទុកវីរុសហ្ស៊ីកា។

តាមរបាយការណ៍របស់ក្រសួងសុខាភិបាល វីរុសហ្ស៊ីកាបានចាប់ផ្តើមមានវត្តមាននៅប្រទេសកម្ពុជាតាំងពីឆ្នាំ ២០០៧មកម្លេះ ហើយត្រូវបានក្រសួងសុខាភិបាល បញ្ជាក់ថាមានចំនួន ៨ករណីរួចមកហើយ ពោលគឺក្នុងកំឡុងឆ្នាំ ២០០៧ ដល់ ឆ្នាំ ២០១០ ចំនួន ៧ ករណី និងមួយករណីទៀតរកឃើញនៅថ្ងៃទី ១១ ខែវិច្ឆិកា ឆ្នាំ ២០១៦ នៅខេត្តកំពង់ចាមនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ