ក្រសួងរៀបចំដែនដី នគរូបនីយកម្ម និងសំណង់ បានប្រកាសថា មន្ត្រីរបស់ខ្លួនចំនួន ៥៦៩នាក់ គ្រោងនឹងចុះស្រង់ព័ត៌មានពលរដ្ឋរស់នៅក្នុងអគារចាស់ទ្រុឌទ្រោមប៊ុលឌីង ឬហៅ អគារ “ស” នៅដើមខែក្រោយនេះ។
ក្នុងសេចក្ដីជូនដំណឹងកាលពីថ្ងៃម្សិលមិញ ក្រសួងបានប្រកាសថា ក្រុមការងាររបស់ក្រសួងចំនួន ១៧១ក្រុម ស្មើនឹង ៥៦៩នាក់ នឹងចុះស្រង់ព័ត៌មានរបស់ម្ចាស់ចំណែកឯកជនទាំងអស់នៃអគារប៊ូលឌីញ នៅថ្ងៃទី០៣ ខែធ្នូ ឆ្នាំ២០១៦។
អគារដ៏ចាស់ទ្រុឌទ្រោមមួយនេះ ត្រូវបានរដ្ឋាភិបាលកម្ពុជាផ្ដល់សិទ្ធិទៅដល់ក្រុមហ៊ុនជប៉ុន Arakawa សម្រាប់អភិវឌ្ឍន៍ក្នុងទឹកប្រាក់ចំនួន ៨០លានដុល្លារ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី៩ ខែវិច្ឆិកាកន្លងមកនេះ បានសង្កត់ធ្ងន់ទៅលើជម្រើសអភិវឌ្ឍន៍នៅនឹងកន្លែងជាជាងការផ្ដល់សំណងជាថវិកាពី ៦ ទៅ ៧ម៉ឺនដុល្លារ សម្រាប់ការចាកចេញ៕
