ក្រុមអ្នកជំនាញនៃបណ្តុំអង្គការសង្គមស៊ិវិលមួយចំនួនបានផ្ដល់អនុសាសន៍នៅក្នុងសន្និសីទថា ដើម្បីកែលម្អនិងដោះស្រាយបញ្ហាប្រឈមក្នុងទីក្រុងភ្នំពេញ គឺត្រូវការជាចាំបាច់នូវកិច្ចសហប្រតិបត្តិការវាងរដ្ឋនិងវិស័យឯកជន។
នៅក្នុងសន្និសិទស្ដីអំពី «ទីក្រុងយើងទាំងអស់គ្នា» ដែលប្រព្រឹត្តធ្វើនៅអង្គការឌាយកូនៀរ នាថ្ងៃទី២៣ ខែវិច្ឆិកា នៅទីក្រុងភ្នំពេញ បានផ្ដោតសំខាន់លើប្រធានបទចំនួន៣ ដើម្បីកែលម្អស្ថានភាពទូទៅក្នុងទីក្រុងភ្នំពេញ គឺ ១-ទីក្រុងដែលមានភាពធន់ ២-តម្រូវការចាំបាច់សម្រាប់ទីក្រុង និង ៣-លំនៅដ្ឋានសមរម្យ។
អ្នកជំនាញបានលើកឡើងនៅក្នុងសន្និសិទនេះថាទីក្រុងភ្នំពេញកំពុងជួបបញ្ហាស្មុគស្មាញជាច្រើនដែលពិបាកដោះស្រាយ ដូចជា ភាពក្រីក្រ អគ្គិភ័យ ការបំពុលបរិយាកាស និងបំពុលខ្យល់ ការបាក់ច្រាំងទន្លេ ការគ្រប់គ្រងប្រព័ន្ធលូ ទឹក និងកាកសំណល់ ជាដើម។
លោក Fouad Bendimerad ទីប្រឹក្សាផ្នែកគ្រប់គ្រង់ហានិភ័យនៅអង្គការ Earthquake Megacities Initiative សង្កត់ធ្ងន់ថាដើម្បីអភិវឌ្ឍទីក្រុងភ្នំពេញឲ្យកាន់តែល្អប្រសើរ គឺត្រូវការជាចាំបាច់នូវកិច្ចសហប្រតិបត្តិការវាងរដ្ឋ និងវិស័យឯកជន តាមរយៈការជម្រុញឲ្យមានក្រុមហ៊ុនធានារ៉ាប់រងកាន់តែច្រើន ការពង្រឹងប្រព័ន្ធអប់រំ និងការបណ្ដុះបណ្ដាល ការគោរពច្បាប់ ការកាត់បន្ថយហានិភ័យនៅទីក្រុង និងបង្កើនការវិនិយោគបរទេស។
លោក អៀង អូនី អភិបាលរងរាជធានីភ្នំពេញឲ្យដឹងដែរថាកម្ពុជាមានបញ្ហាមួយចំនួនត្រូវដោះស្រាយជាបន្ទាន់ រួមមាន បញ្ហាកកស្ទះចរាចរ បញ្ហាសំរាម និងកាកសំណស់ ជម្លោះដីធ្លីរាំរ៉ៃ ការគ្រប់គ្រងប្រព័ន្ធលូ និងទឹកស្អាត ព្រមទាំងកង្វះការយល់ដឹងរបស់ពលរដ្ឋ។
លោកអះអាងថារដ្ឋាភិបាលកម្ពុជាបាន និងកំពុងចាត់វិធានការដើម្បីដោះស្រាយបញ្ហាទាំងអស់នេះ ដោយថាគម្រោងអភិវឌ្ឍដែលរដ្ឋាភិបាលដាក់ចេញអាចសម្រេចទៅបានដោយសារការចូលរួមពីសំណាក់អាជ្ញាធរមូលដ្ឋាន ប្រជាពលរដ្ឋ និងការគោរពច្បាប់ទាំងអស់គ្នា។
លោកថា៖ «ទី១ គឺអាជ្ញាធរមូលដ្ឋានហ្នឹងហើយដែលជាអ្នកម្ចាស់គម្រោង ជម្រុញការអនុវត្ត ទី២ ប្រជាពលរដ្ឋដែលកំពុងរស់ក្នុងទីក្រុង»។
ក្រៅពីនេះ វាគ្មិនមួយចំនួនលើកឡើងដូចគ្នាដោយទទូចឲ្យសាលាក្រុងភ្នំពេញគួរមានប្លង់មេគ្រប់គ្រងដីធ្លីឲ្យបានត្រឹមត្រូវ អនុវត្តក្របខ័ណ្ឌច្បាប់ការពារសហគមន៍ ពង្រឹងហេដ្ឋារចនាសម្ព័ន្ធ និងដំណោះស្រាយទឹកស្អាតជូនដល់ពលរដ្ឋ៕
