រដ្ឋាភិបាលយោធាថៃបានប្រកាសថា ការបោះឆ្នោតជាសកល នឹងប្រព្រឹត្តទៅនៅឆ្នាំក្រោយតាមការគ្រោងទុក ខណៈមានការព្រួយបារម្ភថា ពួកយោធា នឹងប្រើហេតុផលផ្សេងៗ ពន្យារពេលបោះឆ្នោតដើម្បីក្តោបក្តាប់អំណាច។
អ្នកអង្កេតការណ៍មើលឃើញថា ការប្រកាសកាន់ទុក្ខនៅក្នុងប្រទេសថៃ រយៈពេល១ឆ្នាំ ហើយរាល់ការចរចានយោបាយនានាត្រូវបានទាត់ចោលទាំងអស់ ជាការកាន់ទុក្ខស្តេចភូមិវិលបុលចូលទិវង្គតនោះ នឹងធ្វើឲ្យនយោបាយនៅក្នុងប្រទេសកាន់តែជួបភាពតានតឹង។
ពួកគេសម្តែងការព្រួយបារម្ភថា រដ្ឋាភិបាលយោធាដែលកំពុងទទួលការរិះគន់ក្រោយពេលធ្វើរដ្ឋប្រហារឡើងកាន់អំណាចកាលពីឆ្នាំ២០១៤នោះ នឹងប្រកាសពន្យារពេលការបោះឆ្នោតសកលនៅឆ្នាំ២០១៧ គឺពន្យារទៅក្រោយទៀតរហូតចប់ការកាន់ទុក្ខមួយឆ្នាំនៃការចូលទិវង្គតរបស់ស្តេច។
ប៉ុន្តែឧបនាយករដ្ឋមន្ត្រីថៃ លោក Prawit Wongsuwan បានច្រានចោលការព្រួយបារម្ភនោះ ហើយថា ការបោះឆ្នោតសកលនឹងចាប់ផ្តើមនៅឆ្នាំក្រោយដូចការគ្រោងទុក។ លោក ថា មិនមានអ្វីប្រែប្រួលនោះទេ បើសិនជាសភាពការណ៍ល្អ រដ្ឋាភិបាលបច្ចុប្បន្ននឹងរៀបចំការបោះឆ្នោត។ ទោះយ៉ាងណារដ្ឋាភិបាលយោធាថៃបច្ចុប្បន្នមិនបានបញ្ជាក់ថា ការបោះឆ្នោតនឹងធ្វើឡើងនៅខែណានោះទេ។
ពួកយោធា បានប្តេជ្ញារៀបចំសណ្តាប់ធ្នាប់ និងរៀបចំកែទម្រង់នយោបាយ ក្រោយពេលបណ្តេញលោកស្រី យីងឡាក់ចេញពីតំណែងជានាយករដ្ឋមន្ត្រី ដោយសារការដឹកនាំមានចលាចល។
