លោក ហ្វីដែល កាស្ត្រូ មេដឹកនាំបដិវត្តន៍គុយបាដែលបានកសាងរដ្ឋកុម្មុយនីស្តនៅជិតបង្កើយនឹងសហរដ្ឋអាមេរិក និងបានឈរជើងយ៉ាងរឹងមាំអស់រយៈពេល ៥ទសវត្សរ៍ ប្រឆាំងនឹងការប៉ុនប៉ងទម្លាក់រូបលោកពីសំណាក់សហរដ្ឋអាមេរិកនោះ ពេលនេះបានទទួលមរណភាពហើយ ក្នុងជន្មាយុ ៩០ឆ្នាំ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានស្ដាប់សេចក្ដីប្រកាសរបស់រដ្ឋាភិបាលគុយបា។
លោក កាស្ត្រូ បានបាត់ជីវិតនៅយប់ថ្ងៃសុក្រ ម៉ោងគុយបា នៅឯទីក្រុងហាវ៉ាណា ឬត្រូវនឹងព្រឹកថ្ងៃសៅរ៍ម៉ោងនៅកម្ពុជា។ ប្អូនប្រុសរបស់លោក ហ្វីដែល កាស្ត្រូ គឺលោកប្រធានាធិបតី រ៉ាអ៊ូល កាស្ត្រូ បានប្រកាសអំពីមរណភាពអតីតមេដឹកនាំគុយបារូបនេះ តាមកញ្ចក់ទូរទស្សន៍។
ប្រធានាធិបតីគុយបា បានប្រកាសតាមទូរទស្សន៍ជាតិថា អគ្គមេបញ្ជាការបដិវត្ដន៍គុយបា បានស្លាប់នៅម៉ោង ២២:២៩នាទីយប់ (ត្រូវនឹងព្រឹកថ្ងៃសៅរ៍ម៉ោងនៅកម្ពុជា)៕