ក្រុមបាតុករមូស្លីមពោរពេញទៅដោយកំហឹង បានចុះផ្លូវតវ៉ានៅតាមបណ្ដាទីក្រុងនានា ចាប់ពីទីក្រុងហ្សាកាតាប្រទេសឥណ្ឌូណេស៊ី រហូតដល់ទីក្រុងដាកា ប្រទេសបង់ក្លាដែស ដើម្បីបរិហារចំពោះប្រទេសភូមា ជុំវិញការចោទថា បានសម្លាប់ និងរំលោភដោយមិនរើសមុខ ទៅលើជនមូស្លីមរ៉ូហ៊ីងយ៉ា នៅរដ្ឋរ៉ាក់ឃីន។
កាលពីថ្ងៃម្សិលមិញ ជនមូស្លីមបង់ក្លាដែសប្រហែល ៥ពាន់នាក់ បានចេញតវ៉ានៅទីក្រុងដាកាបន្ទាប់ពីពួកគេបួងសួងនៅថ្ងៃសុក្រ ខណៈដែលជនមូស្លីមរាប់រយនាក់នៅទីក្រុងគួឡាឡុំពួរ ទីក្រុងហ្សាកាតា និងទីក្រុងបាងកក បានចោទប្រទេសភូមាថា កំពុងបោសសម្អាត និងប្រព្រឹត្តអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា នៅរដ្ឋរ៉ាក់ឃីន ស្ថិតនៅភាគខាងជើងប្រទេសភូមា។
គណៈរដ្ឋមន្ត្រីម៉ាឡេស៊ី ក៏បានចេញសេចក្ដីថ្លែងការណ៍ថ្កោលទោសអំពើហិង្សានៅទីនោះផងដែរ ដោយបានបញ្ចេញពាក្យរិះគន់ខ្លាំងខុសប្រក្រតី ប្រឆាំងនឹងប្រទេសសមាជិកអាស៊ានមួយនេះ។
អង្គការសហប្រជាជាតិ បាននិយាយថា ជនជាតិរ៉ូហ៊ីងយ៉ាដល់ទៅ ៣ម៉ឺននាក់ហើយ បានបោះបង់ផ្ទះសម្បែងរបស់ពួកគេនៅភូមា ហើយរត់ភៀសខ្លួនចេញពីអំពើហិង្សា បន្ទាប់ពីកងទ័ពភូមាសម្រុកចូលរដ្ឋមួយនេះចាប់តាំងពីដើមខែវិច្ឆិកានេះ៕
