ប្រធានាធិបតីជាប់ឆ្នោតអាមេរិក លោក ដូណល ត្រាំ បានប្តេជ្ញាកាលពីថ្ងៃពុធម្សិលមិញថា នឹងដកខ្លួនឲ្យឆ្ងាយពីពិភពនៃការធ្វើពាណិជ្ជកម្មរបស់លោក ដើម្បីជៀសវាងទំនាស់ផលប្រយោជន៍ ពេលដែលលោកចូលកាន់តំណែងជាប្រធានាធិបតីសហរដ្ឋអាមេរិក នៅថ្ងៃទី២០ ខែមករាខាងមុខ។
ត្រាំ គឺជាមហាសេដ្ឋីអចលនទ្រព្យ ដែលជាម្ចាស់សណ្ឋាគារនិងរមណីយដ្ឋានវាយកូនគោលទាំងនៅ Panama និង Scotland ថ្លែងថា លោកនឹងប្រកាសជាផ្លូវការនៅក្នុងសន្និសីទនៅថ្ងៃទី១៥ ខែធ្នូ ពីការដើរចេញពីការងារអាជីវកម្ម។ លោកថានឹងថ្លែងទៅក្រុមអាជីវករទូទាំងពិភពលោកជាដៃគូររបស់លោក ពីការដើរចេញពីមុខរបរនេះ។
ក្រោយពេលដែល ត្រាំ ឈ្នះការបោះឆ្នោតកាលពីថ្ងៃទី៨ ខែវិច្ឆិកាមក ក្រុមហ៊ុនរបស់លោកបានរៀបចំរចនាសម្ព័ន្ធនិងការផ្ទេរការគ្រប់គ្រងទៅឲ្យ Ivanka Trump និង Eric Trump ជាកូនរបស់ ត្រាំ។
លោក ត្រាំ បានផ្តល់ព័ត៌មានលម្អិតពីការផ្លាស់ប្តូរអ្នកគ្រប់គ្រងអាជីវកម្មរបស់លោកជាបន្តបន្ទាប់ ប៉ុន្តែលោកថា ឯកសារផ្លូវច្បាប់ គឺក្រុមការងាររបស់លោកកំពុងតែរៀបចំ ហើយថាការធ្វើសន្និសីទនៅថ្ងៃទី១៥ ខែធ្នូ កូនរបស់លោកដែលទទួលភារកិច្ចបន្តនោះនឹងចូលរួមផងដែរ៕
