ជប៉ុននិងកូរ៉េខាងត្បូងនៅថ្ងៃសុក្រនេះ បានសម្រេចដាក់ទណ្ឌកម្មបន្ថែមលើកូរ៉េខាងជើង ដោយឯកតោភាគី ចំពោះករណីដំណើរការកម្មវិធីអាវុធនុយក្លេអ៊ែនិងមីស៊ីលឆ្លងទ្វីបរបស់កូរ៉េខាងជើង ស្របទៅតាមការអនុញ្ញាតពីអង្គការសហប្រជាជាតិឲ្យមានការដាក់សម្ពាធលើកូរ៉េខាងជើង។
កូរ៉េខាងជើងបានបដិសេធដំណោះស្រាយរបស់អង្គការសហប្រជាជាតិ ក្នុងការជួយដោះស្រាយចំពោះការកាត់បន្ថយការនាំចេញរបស់កូរ៉េខាងជើងដោយសារការបាញ់សាកល្បងអាវុធនុយក្លេអ៊ែលើកទី៥ ដែលជាការបាញ់ទ្រង់ទ្រាយធំបំផុតកាលពីខែកញ្ញាកន្លងទៅ។
ទាំងកូរ៉េខាងត្បូងនិងជប៉ុន បានចេញសេចក្តីសម្រេចជាឯកតោភាគីរួចហើយ ក្នុងការដាក់ទណ្ឌកម្មបន្ថែមប្រឆាំងរដ្ឋអំណាចទីក្រុងព្យុងយាង។ នេះបើតាមទីភ្នាក់ងារសារព័ត៌មានរ៉យទ័រ។
កូរ៉េខាងត្បូងបានបញ្ជាក់នៅថ្ងៃសុក្រនេះថា ពួកគេបានដាក់មន្ត្រីជាន់ខ្ពស់របស់កូរ៉េខាងជើងមួយចំនួននៅក្នុងបញ្ជីខ្មៅក្នុងនោះរួមមាន មនុស្សស្និទ្ធលោកគឹម ជូងអ៊ុន Choe Ryong Hae និង Hwang Pyong So។ ក្រៅពីនេះ កូរ៉េខាងត្បូងបានបញ្ជាក់ពីការរឹតបន្តឹងមួយចំនួនទៀតលើកូរ៉េខាងជើង។
នៅថ្ងៃសុក្រនេះ ជប៉ុនបានប្រកាសថា បានបន្ថែមកំណត់នាវាជាច្រើនទៀតរបស់ខ្លួនមិនឲ្យចូលកំពង់ផែរបស់កូរ៉េខាងជើងទៀតទេ៕
