ពលរដ្ឋកូរ៉េខាងត្បូងរាប់រយពាន់នាក់ បានចេញតវ៉ាជាថ្មីម្ដងទៀតនៅកណ្ដាលទីក្រុងសេអ៊ូលកាលពីល្ងាចថ្ងៃម្សិលមិញ ដែលជាបាតុកម្មនៅចុងសប្ដាហ៍ចំនួន ៦លើករួចមកហើយ ដើម្បីទាមទារទៅប្រធានាធិបតីកូរ៉េខាងត្បូង អ្នកស្រី ផាក ហ្គឹនហេ ឲ្យចុះចេញពីតំណែង ដោយសារតែរឿងអាស្រូវនយោបាយ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
ក្បួនបាតុកម្មនោះ បានកើតឡើងបន្ទាប់ពីបក្សប្រឆាំងចំនួន ៣ បានបង្ហាញច្បាប់មួយទៅសភា សម្រាប់ដាក់បន្ទុកទៅលើអ្នកស្រី ផាក ដែលអាចនឹងក្លាយជាប្រធានាធិបតីជាប់ឆ្នោតដំបូងគេដែលនឹងត្រូវចាកចេញពីតំណែងមុនអាណត្តិទាំងខូចបង់កិត្តិយស។
ច្បាប់នោះ ដែលចុះហត្ថលេខាដោយសមាជិកសភា ១៧១រូប ក្នុងចំណោមសមាជិកសភា ៣០០រូប បានចែងថា អ្នកស្រី ផាក បានរំលោភរដ្ឋធម្មនុញ្ញ និងក្រមព្រហ្មទណ្ឌ តាមរយៈការរំលោភអំណាច នៅក្នុងរឿងអាស្រូវប្រើប្រាស់ឥទ្ធិពល។
ក្រុមបាតុករដែលបានដើរក្បួននៅចម្ងាយ ១០០ម៉ែត្រពីវិមានខៀវនោះ បានអំពាវនាវទៅអ្នកស្រី ផាក ឲ្យចុះចេញភ្លាមៗ ដោយពួកគេបានច្រានចោលការសុំទោសជាសាធារណៈរបស់អ្នកស្រី និងស្នើទៅសភាឲ្យសម្រេចពីពេលវេលា និងវិធីសម្រាប់ឲ្យអ្នកស្រី ផាក ចុះចេញពីតំណែង។
ស្ត្រីវ័យ ៤៣ឆ្នាំ អ្នកស្រី គីម ចែវ៉ា ដែលបានចូលរួមជាមួយកូនស្រីវ័យជំទង់ ២រូបផងនោះ បាននិយាយថា៖ “វាជារឿងអាម៉ាស់សម្រាប់ជាតិ ដែលអ្នកស្រី ផាក នៅតែស្ថិតក្នុងតំណែងនៅឡើយ។ អ្នកស្រី ផាក គួរតែចុះចេញហើយ”។
ដោយដៃកាន់ស្លាកអក្សរសរសេរថា “ចាប់ខ្លួនអ្នកស្រី ផាក ហ្គឹនហេ” អ្នកស្រី គីម បន្ថែមថា៖ “ខ្ញុំគិតថា វាសំខាន់ណាស់ក្នុងការអប់រំពួកគេ ឲ្យបានយល់នូវអ្វីគឺជាប្រជាធិបតេយ្យ”។
អ្នកស្រី ផាក ត្រូវបានគេចោទថា បានឃុបឃិតជាមួយមិត្តភក្តិ អ្នកស្រី ឆយ ស៊ុនស៊ីល ដែលត្រូវបានតុលាការចោទប្រកាន់ពីបទរំលោភអំណាច ដើម្បីគាប់សង្កត់ទៅលើបណ្ដាក្រុមហ៊ុនធំៗ ជាថ្នូរទៅនឹងការទទួលបានមូលនិធិសម្រាប់អង្គការសប្បុរសមួយ ដែលត្រូវបានរៀបចំឡើងសម្រាប់ជួយជំរុញគំនិតផ្ដួចផ្ដើមរបស់អ្នកស្រី ផាក។
អ្នកស្រី ផាក បានបដិសេធថា អ្នកស្រីមិនបានប្រព្រឹត្តខុសនោះទេ ប៉ុន្តែ បានថ្លែងសុំទោសចំពោះសាធារណជន៕
