នាយករដ្ឋមន្ត្រីនូវែលសេឡង់ លោក John Key ប្រកាសលាលែងចេញពីតំណែងនៅព្រឹកថ្ងៃចន្ទនេះ ភ្លាមៗនាំឲ្យមានការភ្ញាក់ផ្អើល ដោយលោកធ្វើឡើងក្នុងរយៈពេលខ្លីពេក ក្នុងការបញ្ចប់តួនាទីរបស់លោកដោយថា ដើម្បីឲ្យអ្នកមានសមត្ថភាពផ្សេងបន្តដឹកនាំ។
នាយករដ្ឋមន្ត្រីរូបនេះថ្លែងថា លោក ក៏គិតដូចជាគណបក្សរបស់លោកដែរគឺថា អ្វីដែលបានធ្វើកន្លងមកបានល្អប្រសើរ ហើយថា គណបក្សរឹតតែធ្វើការងារបានល្អទៅទៀត។ ប៉ុន្តែលោកថា ដោយសារការពិចារណាមើលឃើញថា ការដឹកនាំរបស់លោកយូរពេកទើបសម្រេចចិត្តឲ្យបាននៅឆ្នាំនេះ ក្នុងការលាលែងចេញពីតំណែង និង រៀបចំឲ្យមានមេដឹកនាំថ្មី។ នេះបើតាមសារព័ត៌មានChannel News Asia។
លោកថ្លែងក្នុងសន្និសីទសារព័ត៌មាននៅថ្ងៃនេះថា នេះគឺជាការសម្រេចដ៏លំបាកបំផុត ហើយបញ្ជាក់ថា នឹងប្រជុំជាមួយគណបក្សជាតិនិយមរបស់លោកនៅថ្ងៃទី១២ខែធ្នូខាងមុខនេះ ដើម្បីពិភាក្សាពីការបោះឆ្នោតជ្រើសរើសមេដឹកនាំបន្ត។
លោកថា លោកមិនមានលទ្ធភាពក្នុងការបម្រើការងាររហូតដល់អាណត្តិទី៤បានពេញលេញនោះទេ។
លោក Key អាយុ៥៥ឆ្នាំ កំពុងដឹកនាំក្នុងអាណត្តិទី៣របស់លោកក្នុងតួនាទីជានាយករដ្ឋមន្ត្រី ដែលបានជាប់ឆ្នោតលើកដំបូងតាំងពីឆ្នាំ២០០៨។
ក្នុងសន្និសីទនៅថ្ងៃនេះ លោក Key ក៏បានលើកសរសើរឧបនាយករដ្ឋមន្ត្រីរបស់លោក គឺលោក Bill English ថា ជាមនុស្សមានសមត្ថភាពសាកសមជាមេដឹកនាំបន្ត។