អនុប្រធានាធិបតីជាប់ឆ្នោតអាមេរិកថ្លែងកាលពីថ្ងៃអាទិត្យម្សិលមិញថា កិច្ចសន្ទនាមានភាពចម្រូងចម្រាស់រវាង លោក ត្រាំ និងមេដឹកនាំតៃវ៉ាន់កាលពីពេលថ្មីៗនេះ គឺគ្រាន់តែជាការសំដែងការគួរសមតែប៉ុណ្ណោះ។
អនុប្រធានាធិបតីជាប់ឆ្នោត Mike Pence ថ្លែងក្នុងកម្មវិធីព័ត៌មានចុងសប្តាហ៍របស់ ABC កាលពីម្សិលមិញថា ការជជែកគ្នាតាមទូរសព្ទកាលពីថ្ងៃសុក្រនោះ គ្រាន់តែជាការសំដែងការគួរសម ហើយមិនមានអ្វីលើសពីនេះទេ។
ទោះយ៉ាងណា ការថ្លែងរបស់លោក ត្រាំ តាមទូរសព្ទជាមួយ លោកស្រី សៃ អ៊ឺងវេន មេដឹកនាំតៃវ៉ាន់នោះ ជាការបង្ហាញសញ្ញាថ្មីនៃការទំនាក់ទំនងការទូតរវាងចិននិងអាមេរិកប្រឈមបញ្ហាច្រើន។
រដ្ឋអំណាចទីក្រុងវ៉ាស៊ីនតោនបានប្រកាសផ្តាច់ទំនាក់ទំនងការទូតជាមួយដែនដីកោះតៃវ៉ាន់ កាលពីឆ្នាំ១៩៧៩ ហើយភ្ជាប់ការទូតជាមួយចិន ទទួលស្គាល់គោលនយោបាយចិនតែមួយ ជាហេតុផលមិត្តភាព ហើយមិនបានភ្ជាប់ទំនាក់ទំនងផ្លូវការជាមួយរដ្ឋអំណាចក្រុងតៃប៉ិកនោះទេ។
រដ្ឋអំណាចទីក្រុងប៉េកាំង បានប្រកាសថា ដែនដីតៃវ៉ាន់គឺជាផ្នែកមួយរបស់ខ្លួន ដែលរងចាំតែការផ្សះផ្សាជាតិឡើងវិញ ហើយចិនព្យាយាមប្រឆាំងគ្រប់រូបភាព ការដែលអាមេរិកទទួលស្គាល់ថាដែនដីនោះឯករាជ្យគឺគ្រាន់តែលោក ត្រាំ ហៅទូរសព្ទទៅកាន់មេដឹកនាំតៃវ៉ាន់ ក៏មានប្រតិកម្មពីរដ្ឋអំណាចទីក្រុងប៉េកាំងខ្លាំងដែរ៕