អ្នកស្រី ផាក យល់​ព្រម​ចុះ​ចេញ​ពី​តំណែង​នៅ​ខែ​មេសា​ឆ្នាំ​ក្រោយ

ប្រធានាធិបតីកូរ៉េខាងត្បូង អ្នកស្រី ផាក ហ្គឹនហេ នៅថ្ងៃនេះ បានប្រាប់ថា អ្នកស្រីទទួលយកសំណើរបស់គណបក្ស សម្រាប់ការចុះចេញពីតំណែង នៅខែមេសា ឆ្នាំក្រោយនេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីមន្ត្រីគណបក្ស Saenuri លោក ជុង ជិនសុក។

មន្ត្រីបក្សសេនូរីរូបនេះ បានប្រាប់ Reuters ថា អ្នកស្រី ផាក ក៏នឹងទទួលយកលទ្ធផលនៃការបោះឆ្នោតដកសេចក្ដីទុកចិត្តប្រឆាំងនឹងអ្នកស្រី នៅសប្ដាហ៍នេះផងដែរ ប៉ុន្តែ បញ្ជាក់ថា អ្នកស្រីនឹងមិនចុះចេញពីតំណែងទៅតាមការទាមទាររបស់ក្រុមគណបក្សប្រឆាំងនោះឡើយ។

បើតាម Reuters សេចក្ដីព័ត៌មាននេះ បានកើតឡើងក្រោយពីជំនួបមួយរវាងក្រុមមេដឹកនាំគណបក្ស និងប្រធានាធិបតី ដែលរុំរឹតទៅដោយរឿងអាស្រូវនយោបាយ។

អ្នកស្រី ផាក កំពុងប្រឈមុខនឹងសប្ដាហ៍ដ៏សំខាន់មួយ ជាមួយនឹងកិច្ចខិតខំប្រឹងប្រែងដើម្បីដកសេចក្ដីទុកចិត្តពីអ្នកស្រី នៅក្នុងគណបក្សអ្នកស្រីផ្ទាល់តែម្ដង៕