ប្រធានាធិបតីជាប់ឆ្នោតអាមេរិកលោក ដូណល ត្រាំ ថ្លែងកាលពីថ្ងៃព្រហស្បតិ៍ម្សិលមិញថា សហរដ្ឋអាមេរិកត្រូវការពង្រីកទំនាក់ទំនងឲ្យកាន់តែខ្លាំងជាមួយប្រទេសចិន បើទោះជាលោករិះគន់ចិនលើគោលនយោបាយសេដ្ឋកិច្ចនិងការបរាជ័យលើការដោះស្រាយបញ្ហាអាវុធនុយក្លេអ៊ែរបសកូរ៉េខាងជើងក៏ដោយ។
ត្រាំ ថ្លែងក្នុងការជួបជុំមួយនៅ Lowa កាលពីម្សិលមិញថាជាផ្នែកមួយសំខាន់បំផុតក្នុងការទំនាក់ទំនង គឺលោកត្រូវតែពង្រឹងការទំនាក់ទំនងជាមួយប្រទេសចិន។ សហរដ្ឋអាមេរិកនិងចិន គឺជាប្រទេសដែលមានសេដ្ឋកិច្ចរីកចម្រើនខ្លាំងជាងគេលើពិភពលោក។ នេះបើតាមទីភ្នាក់ងារសារព័ត៌មានរ៉យទ័រ។
លោក ត្រាំ ថ្លែងថា ចិនមិនមែនជាទីផ្សារសេដ្ឋកិច្ចនោះទេ លោកថាប្រទេសនេះមិនទាន់រៀបចំបានល្អចំពោះផ្លូវច្បាប់ ដែលលោកថាពេលនេះចិនត្រូវចាប់ផ្តើមឡើង។
ត្រាំ ធ្លាប់បានរិះគន់ចិននៅពេលដែលលោកធ្វើយុទ្ធនាការឃោសនាបោះឆ្នោតនិងមានប្រតិកម្មផ្លូវការទូតពីក្រុងបេកាំងកាលពីសប្តាហ៍មុនពេល ដែលលោកបាននិយាយតាមទូរសព្ទជាមួយប្រធានាធិបតីតៃវ៉ាន់លោកស្រី សៃ អ៊ឺងវេន ដែលចិនចាត់ទុកថា តៃវ៉ាន់នៅតែជាផ្នែកមួយនៃដែនដីរបស់ខ្លួន។
ករណីនេះជាលើកដំបូងហើយដែលមន្ត្រីជាន់ខ្ពស់របស់អាមេរិកបានទាក់ទងផ្ទាល់ជាមួយតៃវ៉ាន់ ចាប់តាំងពីប្រធានាធិបតីអាមេរិកលោក Jimmy Carter ទទួលស្គាល់គោលនយោបាយចិនតែមួយ នៅឆ្នាំ១៩៧៩ គឺទទួលស្គាល់រដ្ឋាភិបាលទីក្រុងប៉េកាំង ហើយបោះបង់ចោលដែនដីតៃវ៉ាន់៕
