ក្រុមមន្ត្រីនិយាយថា ការបំផ្ទុះគ្រាប់បែកចំនួន ២លើក បានសម្លាប់មនុស្សយ៉ាងតិច ១៥នាក់ នៅខាងក្រៅកីឡាដ្ឋានបាល់ទាត់មួយកន្លែង នៅទីក្រុងអ៊ីស្តង់ប៊ុល កាលពីថ្ងៃម្សិលមិញនេះ ជាការវាយប្រហារមួយដែលហាក់សំដៅទៅលើក្រុមប៉ូលិស នៅក្នុងរយៈពេលប៉ុន្មានម៉ោងក្រោយការប្រកួតរវាងក្រុមបាល់ទាត់ធំៗចំនួនពីររបស់ប្រទេសតួកគី។ នេះដោយយោងតាមការផ្សាយរបស់សារព័ត៌មាន Channel News Asia។
ប្រធានាធិបតីតួកគី លោក តាយយីប អឺដូហ្គេន បានចាត់ទុកការវាយប្រហារនៅខាងក្រៅកីឡដ្ឋាន Vodafone Arena របស់ក្រុម បាល់ទាត់ Besiktas ជាការវាយប្រហារភេរវកម្ម ទៅលើប៉ូលិស និងជនស៊ីវិល។ លោកថ្លែងថា គោលដៅនៃការបំផ្ទុះគ្រាប់បែកនោះ គឺត្រូវបង្កមហន្តរាយកម្រិតធំធេង។
ការវាយប្រហារនេះ បានធ្វើឲ្យប៉ះពាល់ទៅដល់ប្រទេសតួកគីដែលកំពុងតែព្យាយាមស្ដារខ្លួនឡើងវិញ ក្រោយការវាយប្រហារដោយគ្រាប់បែកជាបន្តបន្ទាប់នៅក្នុងឆ្នាំនេះ នៅតាមបណ្ដាទីក្រុងនានា ដូចជាទីក្រុងអ៊ីស្តង់ប៊ុល និងអង់ការ៉ា ជាដើម។ ការវាយប្រហារមួយចំនួន បង្កឡើងដោយក្រុមជ្រុលនិយមរដ្ឋអ៊ីស្លាម និងខ្លះទៀតបង្កឡើងដោយពួកឧទ្ទាមជនជាតិឃើត។
មន្ត្រីជាន់ខ្ពស់ម្នាក់ បាននិយាយថា មនុស្ស ១៥នាក់ បានស្លាប់ និង ៦៩នាក់ បានរងរបួស៕
