ពលរដ្ឋសហគមន៍រងគ្រោះដោយសារការបណ្ដេញចេញនៅរាជធានីភ្នំពេញ នៅតែបន្តធ្វើយុទ្ធនាការថ្ងៃចន្ទពណ៌ខ្មៅសុំដោះលែងអ្នកជាប់ឃុំ ដោយនិមន្តព្រះសង្ឃមកធ្វើពិធីបែបសាសនា។
តំណាងសហគមន៍បុរីកីឡា អ្នកស្រី ស ស៊ន ឲ្យដឹងថា នៅថ្ងៃទី១២ធ្នូនេះ ពលរដ្ឋសហគមន៍បុរីកីឡាប្រមាណ១០ នាក់បានប្រមូលផ្តុំគ្នាក្នុងសហគមន៍ដោយនិមន្តព្រះសង្ឃមួយអង្គមកសូត្រមន្តនិងដាក់បាត។
អ្នកស្រីបន្តថា ក្នុងពិធីនោះពួកគាត់បាននាំគ្នាលើកបដានិងបង្ហោះប៉េតប៉ោងសុំឲ្យដោះលែង មន្រ្តីសិទ្ធិមនុស្សអាដហុក៤រូប មន្រ្តី គ.ជ.ប លោក នី ចរិយា តំណាងសហគមន៍បឹងកក់អ្នកស្រី ទេព វន្នី និងទាមទារឲ្យសមត្ថកិច្ចបញ្ចេញកាំម៉ារ៉ាសុវត្ថិភាពករណីឃាតកម្មលើលោក កែម ឡី។
អ្នកស្រីឲ្យដឹងទៀតថាការប្រមូលផ្តុំធ្វើយុទ្ធនាការថ្ងៃចន្ទពណ៌ខ្មៅនៅព្រឹកនេះ ក៏មានមន្រ្តីអាជ្ញាធរស្លៀកពាក់ស៊ីវិលប្រមាណ១០នាក់មកចាំឃ្លាំមើលដែរ ប៉ុន្តែមិនមានការរារាំងនោះទេ។
ចំណែកតំណាងសហគមន៍បឹងកក់ អ្នកស្រី បូវ សោ ឲ្យដឹងថា ពួកគាត់ប្រមូលផ្តុំគ្នាធ្វើយុទ្ធនាការថ្ងៃចន្ទពណ៌ខ្មៅនៅម៉ោង៥ល្ងាចនេះ ដោយនិមន្តព្រះសង្ឃមកសូត្រមន្តនិងទេសនា ដើម្បីសុំឲ្យមានការដោះលែងអ្នកជាប់ឃុំទាំងនោះ។
ថ្ងៃចន្ទ ទី១២ ខែធ្នូនេះជាសប្តាហ៍ទី៣១ហើយ ដែលសកម្មជនដីធ្លី សង្គមស៊ីវិល និងប្រជាពលរដ្ឋធ្វើយុទ្ធនាការអាវខ្មៅ ដើម្បីទាមទារឲ្យដោះលែងមន្ត្រីសិទ្ធិមនុស្សអាដហុក៤រូប មន្ត្រី គ.ជ.ប លោក នី ចរិយា សកម្មជនបឹងកក់អ្នកស្រី ទេព វន្នី និងទាមទារឲ្យរកយុត្តិធម៌ករណីសម្លាប់ លោក កែម ឡី៕
