ចំនួនប្រជាជនឥណ្ឌូនេស៊ីបាត់បង់ផ្ទះសម្បែងដោយសាររញ្ជួយដីនៅភាគខាងលិចប្រទេសនោះ បានកើនឡើងដល់ជិត ៨ម៉ឺន ៤ពាន់នាក់ គិតត្រឹមថ្ងៃនេះ ដោយជំរុញឲ្យអាជ្ញាធរខិតខំថែទាំជនរងគ្រោះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីរបស់មន្ត្រីឥណ្ឌូនេស៊ី។
រញ្ជួយដីដ៏ខ្លាំងក្លាកាលពីសប្ដាហ៍មុន បានសម្លាប់មនុស្សជាង ១០០នាក់ ហើយរាប់រយនាក់ទៀតបានរងរបួស នៅក្នុងខេត្តអាឆេ ជាខេត្តដែលធ្លាប់រងគ្រោះយ៉ាងធ្ងន់ធ្ងរបំផុតដោយសារគ្រោះមហន្តរាយរលកយក្សស៊ូណាមិកាលពីឆ្នាំ២០០៤។
បើតាម AFP ផ្ទះសម្បែង អគារពាណិជ្ជកម្ម និងវិហាររាប់ពាន់កន្លែង បានដួលរាបដល់ដីដោយសាររញ្ជួយដីកម្លាំង ៦.៥រ៉ិចទ័រ។
មន្ទីរពេទ្យ និងគ្លីនិកចល័ត ពោរពេញទៅដោយអ្នករងរបួស ចំណែកជម្រកពោរពេញទៅដោយមនុស្សដែលបាត់បង់អ្វីៗទាំងអស់។
អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី និយាយថា ខណៈដែលទំហំនៃមហន្តរាយនៅតែបន្តកើតឡើង ចំនួនប្រជាជនបាត់បង់ផ្ទះសម្បែង បានកើនឡើងដល់ទៅជាង ៨៣៨០០នាក់៕
