នៅក្នុងជំនួបជាមួយប្រធានាធិបតីហ្វីលីពីនកាលពីថ្ងៃម្សិលមិញ លោកនាយករដ្ឋមន្ដ្រី ហ៊ុន សែន បានស្នើដល់ស្ដេចប្រដាល់ ម៉ានី ប៉ាកគីអាវ ឲ្យត្រឡប់មកកាន់ប្រទេសកម្ពុជាថ្មីម្ដងទៀតនាពេលខាងមុខ។
លោក ហ៊ុន សែន បានសរសេរលើបណ្ដាញហ្វេសប៊ុកនៅថ្ងៃព្រហស្បតិ៍នេះថា លោកបានប្រាប់ទៅស្ដេចប្រដាល់ហ្វីលីពីន ប៉ាកគីអាវ ឲ្យមកកាន់ប្រទេសកម្ពុជាជាថ្មីម្ដងទៀត ដើម្បីជួយដល់វិស័យកីឡា ជួយអប់រំទប់ស្កាត់គ្រឿងញៀន និងបញ្ហាចរាចរណ៍ជាដើម។ លើសពីនេះ លោកបានស្នើឲ្យស្ដេចប្រដាល់រូបនេះចូលរួមថតស្ពតអប់រំខ្លីៗជាភាសាខ្មែរទៀតផង។
លោកនាយករដ្ឋមន្ដ្រីលើកឡើងទៀតថា ស្ដេចប្រដាល់រូបនេះនឹងពិចារណាវិលត្រឡប់មកកាន់កម្ពុជាជាថ្មីតាមសំណើរបស់លោក។ លោក ហ៊ុន សែន ក៏បានសរសើរដល់ស្ដេចប្រដាល់រូបនេះថាជាមនុស្សសាមញ្ញ សុភាពរាបសា និងគួរឲ្យរាប់អាន៕
