ទីភ្នាក់ងារព័ត៌មាន AFP បានចុះផ្សាយថា មនុស្ស ១៣នាក់ បានស្លាប់ បន្ទាប់ពីយន្តហោះយោធាមួយគ្រឿង បានធ្លាក់នៅភាគខាងកើតប្រទេសនេះ នៅថ្ងៃនេះ ដែលជាឧបទ្ទវហេតុមួយទៀតសម្រាប់កងទ័ពឥណ្ឌូនេស៊ី។
មន្ត្រីឥណ្ឌូនេស៊ី បានប្រាប់ AFP ថា យន្តហោះ Hercules C-130 បានហោះហើរពីទីក្រុងទីមីកា នៅខេត្តប៉ាពួ ដោយផ្ទុកមនុស្ស ១៣នាក់ ប៉ុន្តែ បានធ្លាក់នៅតំបន់ភ្នំដាច់ស្រយាលមួយ មុននឹងវាចុះចត។
មន្ត្រីឥណ្ឌូនេស៊ី បានឲ្យដឹងថា យន្តហោះនោះគ្រោងចុះចតនៅម៉ោង ៦ និង១៣នាទីព្រឹកថ្ងៃនេះ ប៉ុន្តែ បានដាច់ការទាកទងនៅម៉ោង ៦ និង ៩នាទី តែប៉ុន្មាននាទីមុននឹងវាចុះចត៕