មេដឹកនាំបក្សប្រឆាំង លោក សម រង្ស៊ី កាលពីថ្ងៃម្សិលមិញនេះ បានបង្ហាញក្ដីរំពឹងជាថ្មីទៀតថា គណបក្សរបស់លោក នឹងរៀបចំរដ្ឋាភិបាលស្របច្បាប់មួយ បន្ទាប់ពីឈ្នះការបោះឆ្នោតជាតិនៅឆ្នាំ២០១៨ខាងមុខនេះ ដោយលោកថា គណបក្សកាន់អំណាចសព្វថ្ងៃនេះ នឹងក្លាយជាក្រុមឧទ្ទាម ប្រសិនបើពួកគេប្រឆាំងនឹងរដ្ឋាភិបាលថ្មីដឹកនាំដោយគណបក្សរបស់លោក។
លោក សម រង្ស៊ី បានថ្លែងដូច្នេះនៅក្នុងកិច្ចសម្ភាសមួយជាមួយវិទ្យុសំឡេងសហរដ្ឋអាមេរិក កាលពីថ្ងៃទី១៥ ខែធ្នូនេះ ហើយត្រូវបានផ្សព្វផ្សាយនៅលើទំព័រហ្វេសប៊ុកផ្លូវការរបស់លោក កាលពីថ្ងៃម្សិលមិញនេះ។
ក្នុងកិច្ចសម្ភាសនោះ លោក សម រង្ស៊ី ដែលកំពុងរស់នៅនិរទេសខ្លួនឯងទៅឯបរទេសនោះ បានថ្លែងថា បុគ្គល ឬក្រុមណា ដែលមិនគោរពតាមច្បាប់ និងបទបញ្ជារបស់រដ្ឋាភិបាលថ្មីដែលរៀបចំឡើងដោយគណបក្សសង្គ្រោះជាតិ គឺជាក្រុមឧទ្ទាម ដែលមេបក្សប្រឆាំងរូបនេះចាត់ទុកថា មិនមានលទ្ធភាពតាំងនឹងរដ្ឋាភិបាលថ្មីស្របច្បាប់។
លោក សម រង្ស៊ី និយាយថា៖ “ពេលចាញ់ឆ្នោត បើមានក្រុមណា បុគ្គលណា មិនព្រមធ្វើតាមច្បាប់ គោរពតាមបញ្ជារដ្ឋាភិបាលថ្មីដែលរៀបចំដោយគណបក្សសង្គ្រោះជាតិឈ្នះឆ្នោត យើងនឹងមានសិទ្ធិពេញលេញបង្កើតរដ្ឋាភិបាលថ្មី។ រដ្ឋាភិបាលស្របច្បាប់ មានតែមួយទេ មិនអាចមានរដ្ឋាភិបាលណាមួយទៀតទេ។ [រដ្ឋាភិបាលផ្សេងទៀត] គឺជារដ្ឋាភិបាលខុសច្បាប់ ជាក្រុមឧទ្ទាមវាត្រូវជាង។ តើក្រុមឧទ្ទាមមានលទ្ធភាពតតាំងជាមួយរដ្ឋាភិបាលស្របច្បាប់ រដ្ឋាភិបាលថ្មីដឹកនាំដោយគណបក្សសង្គ្រោះជាតិឬទេ? ខ្ញុំថា អត់មានលទ្ធភាពទេ ពីព្រោះអ្នកណាទៅភ្ជាប់វាសនារបស់ខ្លួនជាមួយនឹងពួកឧទ្ទាម”។
ការថ្លែងបែបនេះរបស់លោក សម រង្ស៊ី ត្រូវបានគេមើលឃើញថា ជាការឆ្លើយតបទៅនឹងលោកនាយករដ្ឋមន្ត្រី ហ៊ុន សែន បានថ្លែងព្រមានទាំងមុន និងក្រោយការបោះឆ្នោតជាតិឆ្នាំ២០១៣ ថា សង្គ្រាមនឹងផ្ទុះឡើង ប្រសិនបើគណបក្សប្រឆាំងឈ្នះការបោះឆ្នោត៕