សកម្មជនដីធ្លីមានជម្លោះដែលសកម្មក្នុងការធ្វើយុទ្ធនាការអាវខ្មៅ អះអាងថា ពួកគេនឹងបញ្ចប់យុទ្ធនានេះត្រឹមសប្តាហ៍នេះ ប្រសិនបើរដ្ឋាភិបាល ព្រមដោះលែងសកម្មជនការពារសិទ្ធិមនុស្ស មន្ត្រីគ.ជ.ប និងតំណាងពួកគេគឺអ្នកស្រី ទេព វន្នី។
តំណាងសហគមន៍បឹងកក់ អ្នកស្រី ប៊ូវ សោភា ឲ្យដឹងថា នៅរសៀលនេះ សហគមន៍អ្នកស្រីបាននាំគ្នាដោះអាវខ្មៅចេញដើម្បីបង្ហាញថា ពួកគាត់នឹងបញ្ឈប់យុទ្ធនាការថ្ងៃច័ន្ទពណ៌ខ្មៅនេះ បើរដ្ឋាភិបាលដោះលែងអ្នកទាំង ៦នាក់ឲ្យមានសេរីភាពវិញនោះ ។
តំណាងសហគមន៍បុរីកីឡា អ្នកស្រី ស ស៊ន ប្រាប់វីអូឌីថា អ្នកស្រីមិនបញ្ឈប់ធ្វើយុទ្ធនាការថ្ងៃច័ន្ធព៌ណខ្មៅឡើយ បើរដ្ឋាភិបាលមិនដោះលែងអ្នកដែលជាប់ឃុំទាំងនោះ ប៉ុន្តែថាពួកគេនឹងឈប់ធ្វើយុទ្ធនាការនេះ លុះត្រាតែរដ្ឋាភិបាលដោះលែងអ្នកដែលកំពុងឃុំជាប់នោះ។
ទោះជាយ៉ងណា សកម្មជនដីធ្លីបង្ហាញក្តីសង្ឃឹមថា រដ្ឋាភិបាលនឹងដោះលែងមន្ត្រីសិទ្ធិមនុស្សទាំង៤រូប មន្ត្រីគ.ជ.ប លោក នី ចរិយា និងអ្នកស្រី ទេព វន្នី ឆាប់ៗនេះ ព្រោះថាប្រធានស្ដីទីគណបក្សសង្គ្រោះជាតិលោក កឹម សុខា ត្រូវបានព្រះមហាក្សត្រ សម្រេចលើកលែងទោស ខណៈអ្នកដែលជាប់ឃុំទាំងនោះ កើតឡើងដោយសារតែករណីសំណុំរឿងលោក កឹម សុខា។
នៅថ្ងៃចន្ទទី១៩ខែធ្នូនេះ គឺជាសប្តាហ៍ទី៣៣ ហើយដែលសកម្មជនដីធ្លី សង្គមស៊ីវិល និងប្រជាពលរដ្ឋធ្វើយុទ្ធនាការអាវខ្មៅ ដើម្បីទាមទារឲ្យដោះលែងមន្ត្រីសិទ្ធិមនុស្សអាដហុក៤រូប មន្ត្រីគ.ជ.ប សកម្មជនបឹងកក់អ្នកស្រី ទេព វន្នី និងទាមទារឲ្យរកយុត្តិធម៌ករណីសម្លាប់ លោក កែម ឡី។
