ករណីបំផ្ទុះគ្រាប់បែកដែលគេចោទថា បង្កឡើងដោយក្រុមIS កាលពីថ្ងៃអាទិត្យម្សិលមិញនៅទីក្រុងមួយនៃប្រទេស យេម៉ែន បានបណ្តាលឲ្យទាហានចំនួន៤៨នាក់បានស្លាប់។
AFP បានចុះផ្សាយថា ការវាយប្រហារនោះគឺក្រុមIS មានបំណងប្រឆាំង ការជ្រើសរើសទាហានបន្ថែមនៅទីក្រុង Aden ជាទីក្រុងធំទី២របស់ប្រទេសយេម៉ែន។
មន្ត្រីយោធា និង ក្រុមគ្រូពេទ្យទាហានបានថ្លែងថា មនុស្សរាប់សិបនាក់បន្ថែមទៀត បានរកឃើញថា រងរបួសដោយសារការបំផ្ទុះគ្រាប់បែកអត្តឃាតនោះ។ ការបោះគ្រាប់បែកនេះ គឺបង្កឡើងដោយបុរសម្នាក់ដែលបន្លំខ្លួនធ្វើជាទាហាន ហើយបានធ្វើសកម្មភាពបំផ្ទុះពេលដែលទាហានផ្តុំគ្នារងចាំបើកប្រាក់ខែ នៅភាគខាងជើងនៃទីក្រុង Aden ។
របាយការណ៍របស់មន្ត្រីជំនាញបញ្ជាក់ថា មានអ្នកស្លាប់៤៨នាក់ និង រងរបួសចំនួន៨៤នាក់ ហើយចំនួនអ្នកស្លាប់អាចនឹងកើនឡើងដោយសារអ្នករងរបួសមួយចំនួនមានសភាពធ្ងន់ធ្ងរ។